میٹا نے نیا ورچوئل رئیلٹی ہیڈ سیٹ کوئیسٹ 3 متعارف کرادیا

معروف ٹیکنالوجی کمپنی میٹا کی جانب سے نیا ورچوئل رئیلٹی (وی آر) ہیڈ سیٹ کوئیسٹ 3 متعارف کرا دیا گیا۔ میٹا کے سی ای او مارک زکربرگ نے اس نئے وی آر ہیڈ سیٹ کو متعارف کرایا۔ کوئیسٹ 3 وی آر ہیڈ سیٹ 500 ڈالرز (128 جی بی اسٹوریج والاورژن) میں آئندہ چند ماہ کے دوران صارفین کو دستیاب ہوگا۔ خیال رہے کہ یہ 2019 کے کوئیسٹ 2 کا اپ ڈیٹڈ ماڈل ہے جس میں کئی نئے فیچرز کا اضافہ کیا گیا ہے۔ اس حوالے سے مارک زکربرگ نے کہا ہے کہ نیا ہیڈ سیٹ پہلے کے مقابلے میں ہلکا ہوگا اور گرافک پرفارمنس بہتر بنانے کے لیے نئے اسنیپ ڈراگون پراسیسر کو استعمال کیا جائے گا۔ اس میں کوئیسٹ 2 کی گیمز کھیلنا ممکن ہوگا۔ میٹا نے کوئیسٹ 2 کی قیمت میں 100 ڈالرز کی کمی کردی ہے جس کے بعد کوئیسٹ 2 اب 300 ڈالرز میں دستیاب ہوگا۔ اس وقت تک میٹا کی جانب سے نئے ہیڈ سیٹ کے بارے میں زیادہ تفصیلات نہیں بتائی گئیں۔ میٹا کے سی ای او کا کہنا ہے کہ آئندہ چند ہفتوں میں ہیڈ سیٹ کے فیچرز کے بارے میں بتایا جائے گا۔ واضح رہے کہ یہ ہیڈ سیٹ اس وقت متعارف کرایا گیا ہے جب آئندہ ہفتے ایپل کی جانب سے کمپنی کا پہلا مکسڈ رئیلٹی ہیڈ سیٹ متعارف کرائے جانے کا امکان ہے۔