ویب ڈیسک: وزیراعلیٰ خیبر پختونخوا علی امین گنڈاپور نے کہا ہے کہ علاقائی امن پاکستان اور افغانستان دونوں ہی کے مفاد میں ہے۔
پشاور میں وزیراعلیٰ علی امین گنڈاپور اور افغان قونصل جنرل حافظ محب اللّٰہ شاکر کی ملاقات ہوئی، جس میں باہمی تجارت کے فروغ اور صوبے میں مقیم افعان شہریوں کو درپیش مسائل زیر غور آئے،ملاقات میں رمضان اور عیدالفطر کے پیش نظر سرحد کو جلد سے جلد کھولنے پر اتفاق کیا گیا۔
وزیراعلیٰ خیبر پختونخوا نے کہا کہ جلد بارڈر کھولنے کی ضرورت ہے، بارڈر کھولنے کےلیے افغان سفارتخانہ اپنا کردار ادا کرے۔
انہوں نے مزید کہا کہ علاقائی امن پاکستان اور افغانستان دونوں کے مفاد میں ہے، ہم نے صوبائی سطح پر افغان حکومت سے مذاکرات کےلیے جرگہ تشکیل دیا ہے۔
علی امین گنڈاپور نے یہ بھی کہا کہ وفاقی حکومت کی طرف سے جرگے کے ٹی او آر کی منظوری کا انتظار ہے۔
اُن کا کہنا تھا کہ افغان باشندوں کو صحت و تعلیم کارڈ کی فراہمی کے لیے بین الاقوامی اداروں سے بات ہو رہی ہے۔
دوسری جانب طورخم کے مقام پر پاک افغان سرحد مسلسل آٹھویں روز بھی ہر قسم کی تجارت اور پیدل چلنے والوں کی آمدورفت کے لیے بند رہی جس کے باعث ایک کروڑ ڈالر سے زائد مالیت کی تجارت متاثر ہوئی ہے۔
کسٹم ز کے ایک عہدیدار نے بتایا کہ افغانستان کی جانب سے پاکستانی حکام سے مشاورت کے بغیر متنازع سرحدی علاقے میں نئی چوکی تعمیر کرنے کے یکطرفہ اقدام کی وجہ سے اہم سرحدی کراسنگ پوائنٹ کو بند کردیا گیا ہے۔