ویب ڈیسک:مشیر اطلاعات خیبرپختونخوا بیرسٹر ڈاکٹر سیف نے کہا ہے کہ لاپتہ کارکن کہاں ہیں ؟ اسپتال یا تھانے میں، پریشان گھروالوں کو بتایا جائے ، جعلی حکومت گرفتار کارکنوں کی اہلخانہ سے جلد ملاقات کا بندوبست کرے۔
تفصیلات کے مطابق اپنے بیان میں بیرسٹر سیف کا کہنا تھا کہ اطلاعات ہیں کہ جعلی حکومت گرفتار کارکنوں سے اہلخانہ کی ملاقات نہیں کرا رہی، ملاقاتیں نہ ہونے سے گھر والوں میں شدید اضطراب پایا جاتا ہے، جعلی حکومت جلد ملاقات کا بندوبست کرے تاکہ اہلخانہ کو تسلی ہو کہ ان کے پیارے زندہ ہے۔
انہوں نے کہا کہ ملاقات کیلئے بے چارے در بدر کی ٹھوکریں کھا رہے ہیں، کبھی ایک تھانے اور کبھی دوسرے تھانے کے چکر لگاتے ہیں، گھر والوں کو بتایا جائے کہ ان کے پیارے تھانے میں ہے یا ہسپتالوں میں؟
ان کا کہنا تھا کہ جعلی حکومت بتائے ملاقاتیں کیوں نہیں کرا رہی، وزیراعلیٰ خیبرپختونخوا نے ہدایت کی کہ گرفتار کارکنوں کی اہلخانہ سے ملاقات کیلئے قانونی معاونت فراہم کریں۔
صوبائی مشیر اطلاعات نے مزید کہا کہ جعلی اور ظالم حکومت نہتے کارکنوں کو کس جرم کی سزا دے رہی ہے، احتجاج تو ہر شہری کا جمہوری اور آئینی حق ہے، جعلی حکومت کی فسطائیت آسمان کو چھو رہی ہے۔