ویب ڈیسک: نوبل انعام یافتہ سماجی کارکن ملالہ یوسفزئی نے گزشتہ دنوں ایک بین الاقوامی میگزین کو انٹرویو دیا۔ انٹرویو میں انھوں نے شادی جیسے اہم ایشو پر گفتگو کی۔ اپنی گفتگو میں انھوں نے اپنی شادی کے حوالے سے بھی بات کی۔
ملالہ یوسفزئی نے بین الاقوامی میگزین کو دیئے گئے انٹرویو میں کہا تھا کہ اگر دو لوگ ساتھ رہنا چاہتے ہیں تو ان کے لیے یہ لازم نہیں کہ شادی کے کاغذات (نکاح نامہ) پر دستخط کریں اور اس کے بعد اکٹھے رہیں۔
اس بیان کے بعد ملالہ ٹوئٹر پر پاکستان میں ٹاپ ٹرینڈ میں رہیں۔ لوگوں نے ان کو شدید تنقید کا نشانہ بناتے ہوئے کئی سوال اٹھائے۔ اس دوران پشاور کی مقامی رویت ہلال کمیٹی کے چیئرمین مفتی شہاب الدین پوپلزئی نے سماجی رابطوں کی ویب سائٹ ٹوئٹر پر ملالہ کے باپ کو ٹیگ کرتے ہوئے ان سے وضاحت مانگی۔
انھوں نے لکھا 'کل سے سوشل میڈیا پر ایک خبر زیر گردش ہے کہ آپ کی بیٹی ملالہ یوسفزئی نے رشتہ ازدواج کو یکسر مسترد کر دیا ہے۔ وہ کہتی ہیں کہ شادی (نکاح) کرنے سے بہتر ہے پارٹنر شپ کی جائے۔ اس بیان سے ہم سب شدید اضطراب میں مبتلا ہیں۔ آپ وضاحت فرمائیں۔
ان کے ٹویٹ کا جواب دیتے ہوئے ملالہ کے باپ ضیا الدین یوسفزئی نے لکھا کہ ایسی کوئی بات نہیں۔ میڈیا اور سوشل میڈیا نے ان کے انٹرویو کے اقتباس کو سیاق و سباق سے نکال کر تبدیل کر کے اپنی تاویلات کے ساتھ شئیر کیا ہے اور بس۔