ویب ڈیسک: معروف بھارتی سپورٹس صحافی وکرانت گپتا نے کہا ہے کہ پاکستانی عوام کی محبت اور عزت بھلا نہیں سکوں گا۔
پاکستان میں چیمپئنز ٹرافی کو کور کرنے کیلئے بھارت سے آئے سپورٹس صحافی وکرانت گپتا نے کہا ہے کہ کھیل سرحدوں سے بالاتر ہوتے ہیں اور لوگوں کے دلوں کو جوڑنے کا سب سے خوبصورت ذریعہ ہیں، امید کرتا ہوں کہ مستقبل میں پاک بھارت کے درمیان کھیلوں کے ذریعے تعلقات مزید بہتر ہوں گے اور ایسے دورے دونوں ملکوں کے عوام کو قریب لانے میں اہم کردار ادا کریں گے۔
چیمپئنز ٹرافی اورایشیا کپ 2023 کے دوران بھارتی ٹیم کی پاکستان نہ آنے کے فیصلے پر تبصرہ کرتے ہوئے گپتا کا کہنا ہے کہ یہ فیصلہ حکومتوں کا تھا لیکن اگر عوام اور صحافی ایک دوسرے کے ملک آ سکتے ہیں تو کھلاڑیوں کو بھی موقع ملنا چاہیے۔
انٹرویو میں وکرانت گپتا نے اپنے تجربات بیان کرتے ہوئے یہ بھی کہا ہے کہ ان کے لیے سب سے حیران کن بات یہ تھی کہ پاکستانی عوام بھارتی کرکٹرز خاص طور پر ویرات کوہلی سے بے حد محبت کرتے ہیں۔
لاہور کی گلیوں، سڑکوں اور میدانوں میں نوجوانوں کو ویرات کوہلی کی نمبر 18 جرسی پہنے دیکھا جو یہ ظاہر کرتا ہے کہ کرکٹ کسی بھی سرحد یا سیاسی کشیدگی سے بالا تر ہے۔