ویب ڈیسک: (علی زیدی) مدھیہ پردیش کے دھار ضلع کے ساگور علاقے کا ایک ویڈیو سوشل میڈیا پر تیزی سے وائرل ہو رہا ہے۔ جس میں لوگوں کا ہجوم ایک نوجوان کو زمین سے تھوک چٹوانے اور منہ میں گوبر ٹھونستے نظر آرہا ہے۔
دراصل یہ پورا معاملہ دھار ضلع کے ساگور علاقے کا بتایا جا رہا ہے۔ نوجوان پر یہاں راستے میں بنی رنگولی پر تھوکنے کا الزام ہے۔ اس کی خبر ملتے ہی گاؤں والوں کی بھیڑ وہاں جمع ہو گئی اور نوجوان کو زبردستی اس کا تھوک چاٹنے پر مجبور کر دیا گیا۔ واقعے کی ویڈیو سوشل میڈیا پر وائرل ہو رہی ہے۔
وائرل ویڈیو کے بارے میں متاثرہ نوجوان کے اہلخانہ کا کہنا ہے کہ نوجوان مزدوری کا کام کرتا ہے۔ ایک ٹھیکیدار اسے کام پر لے گیا تھا۔ گھر والوں نے کہا کہ اس نے سڑک کے کنارے بنی رنگولی کے پاس تمباکو تھوک دیا اور اس کے چھینٹے رنگولی پر پڑ گئے۔ واقعہ کی اطلاع ملتے ہی گاؤں والوں کی بھیڑ وہاں جمع ہوگئی اور اسے زمین سے تھوک چاٹنے پر مجبور کردیا۔ جس کے بعد ہجوم اسے تھانے لے گیا اور پولیس کے حوالے کر دیا گیا، پولیس نے اسے ایس ڈی ایم کے سامنے پیش کیا، جہاں چھٹی کا دن ہونے کی وجہ سے اسے امن خراب کرنے کے الزام میں براہ راست جیل بھیج دیا گیا۔