واٹس ایپ کا ایسا نیا فیچر جو چیٹس کو بدل کر رکھ دے گا

سماجی رابطے کی ویب سائٹ واٹس ایپ کی طرف سے مسلسل نئے فیچرز پر کام ہوتا رہتا ہے ، اب واٹس ایپ کا ایسا نیا فیچر متعارف ہونے جا رہا ہے کہ جو چیٹس کو ہی بدل کر رکھ دے گا ۔ تفصیلات کے مطابق میٹا کی زیرملکیت میسجنگ ایپ کی جانب سے ایک ایسے نئے فیچر پر کام کیا جا رہا ہے کہ جو انفرادی اور گروپ چیٹس کو بدل کر ہی رکھ دے گا۔WABetaInfo کی ایک رپورٹ میں بتایا گیا ہے کہ واٹس ایپ کی جانب سے چیٹس کے اندر اہم پیغامات کو پن (pin) کرنے کا نیا فیچر متعارف کروانے کیلئے کام کیا جارہا ہے ۔ واٹس ایپ کی ہوم فیڈ پر چیٹس کو پن کرنے کا فیچر تو موجود ہے مگر چیٹس کے اندر پیغامات کو پن نہیں کیا جاسکتا ہے ۔مگر اب اس نئے فیچر کی مدد سے صارفین اپنے اہم پیغامات کو چیٹ ونڈو کے ٹاپ پر پن بھی کرسکیں گے ۔ یہ فیچر ان حالات میں کارآمد ثابت ہوگا جب کسی گروپ چیٹ میں بہت زیادہ میسجز بھیجے جاتے ہوں تو اہم پیغامات کو اس کی مدد سے دیکھنا ممکن ہوجائے گا۔البتہ جب کوئی صارف کسی چیٹ میں پیغام کو پن کرے گا تو اس کا علم دیگر افراد کو بھی ہو جائے گا ۔ رپورٹ میں کہا گیا ہے کہ یہ فیچر ابھی بیٹا ورژن میں دیا گیا ہے اور وہاں بھی سب کو دستیاب نہیں ہے تو تمام صارفین کے لیے یہ فیچر کب تک متعارف کروایا جائے گا، اس بارے میں ابھی کچھ بھی کہنا مشکل ہے۔ ویسے یہ کوئی نیا فیچر نہیں، واٹس ایپ کی حریف ایپ ٹیلیگرام میں اس طرح کا ایک فیچر کئی برس پہلے متعارف کروایا گیا تھا۔