سمندر پار پاکستانیوں نے 2.4 بلین امریکی ڈالر سے زائد ترسیلات زر بھیجیں

اسلام آباد: ( پبلک نیوز) سمندر پار پاکستانیوں نے اب تک 175 ممالک سے 250,000 روشن ڈیجیٹل اکاؤنٹس (RDAs) کے ذریعے 2.4 بلین امریکی ڈالر سے زیادہ کی ترسیلات زر بھیجی ہیں،ان میں سےنیا پاکستان سرٹیفکیٹس (NPCs) میں 1.6 بلین امریکی ڈالر سے زیادہ کی سرمایہ کاری بھی کی گئی ہے۔ اے پی پی اردو کے مطابق یہ بات قونصل جنرل آف پاکستان ٹورنٹو (کینیڈا) عبدالحمید نے یہاں قونصلیٹ کی جانب سے بینک الحبیب، پاکستان کے تعاون سے آر ڈی اے کے فروغ کے لیے منعقد کئے گئے ویبنار سے خطاب کرتے ہوئے کہی۔ ویبنار کا مقصد کینیڈا میں مقیم پاکستانیوں میں موجودہ حکومت کے اس عظیم اقدام کے بارے میں آگاہی پیدا کرنا اور پاکستان میں مختلف کمرشل بینکوں کی جانب سے اس کے تحت پیش کی جانے والی مصنوعات، خدمات اور سہولیات کا تعارف کرانا تھا۔ قونصل جنرل آف پاکستان نے کہا کہ اوورسیز پاکستانیوں نے موجودہ حکومت کے اس انقلابی قدم کا تہہ دل سے خیر مقدم کیا ہے۔دیگر مقررین میں سید عرفان علی منیجنگ ڈائریکٹر ڈیپازٹ پروٹیکشن کارپوریشن، اسٹیٹ بینک آف پاکستان منصور علی خان، سی ای او بینک الحبیب لمیٹڈ عون علی، گروپ ہیڈ بزنس بینک الحبیب قمبر علی، ہیڈ روشن ڈیجیٹل اکاؤنٹ بینک الحبیب، اور سیف عباس اسلامی بینکنگ ڈویژن بینک الحبیب نے بھی خطاب کیا۔ویبنار کے شرکاء کا خیرمقدم کرتے ہوئے قونصل جنرل نے وزیراعظم عمران خان کے موقف کا اعادہ کیا اور اوورسیز پاکستانیوں کو ملک کا سب سے بڑا اثاثہ قرار دیتے ہوئے کہا کہ وہ انہیں ملک کی تعمیر و ترقی کی سرگرمیوں اور موجودہ حکومت کے اقدامات میں شامل کرنے کا عزم رکھتے ہیں۔ قونصل جنرل نے غیر ملکی زرمبادلہ کی ترسیلات زر کی شکل میں پاکستانی تارکین وطن کی جانب سے کیے جانے والے بہت بڑے تعاون پر بھی روشنی ڈالی، جو کہ مالی سال 2020-21 کے دوران 29.4 بلین امریکی ڈالر تک پہنچ گئی، جو مالی سال 2019-20 کے دوران موصول ہونے والی ترسیلات زر سے 27 فیصد زیادہ ہے۔ انہوں نے اس طرح کے ویبنارز کی اہمیت پر بھی زور دیا، کیونکہ یہ کمیونٹی کو مواقع فراہم کرتے ہیں۔ اسٹیٹ بینک آف پاکستان سے سید عرفان علی نے آر ڈی اے اسکیم کی نمایاں خصوصیات کا ذکر کیا۔انہوں نے شرکاء کو ان کی سرمایہ کاری کے تحفظ کے بارے میں بھی یقین دہانی کرائی اور کہا کہ تمام سرمایہ کاری حکومت پاکستان کی طرف سے واجب الادا ہے اور اس کی ضمانت ہے۔ اس کے علاوہ، NPCs میں کی گئی تمام سرمایہ کاری کو بغیر کسی جرمانے کے، جیسا کہ اور جب سرمایہ کار چاہے، ختم کیا جا سکتا ہے۔سی ای او بینک الحبیب اور بینک کے دیگر سینئر نمائندوں نے RDA اقدام کے تحت اوورسیز پاکستانیوں کو بینک الحبیب کی جانب سے پیش کی جانے والی خدمات پر روشنی ڈالی۔ بتایا گیا کہ بینک کے اندر ایک خصوصی آر ڈی اے سیکشن بنایا گیا ہے جو سال بھر 24/7 کام کرتا ہے اور بیرون ملک مقیم پاکستانیوں کو درپیش کسی بھی سوالات اور مسائل کا جواب دیتا ہے۔ مزید بتایا گیا کہ آر ڈی اے اوورسیز پاکستانیوں کو نیا پاکستان سرٹیفکیٹس، پاکستان اسٹاک ایکسچینج (PSX)، رئیل اسٹیٹ میں سرمایہ کاری کرنے اور نئی شامل کردہ مصنوعات جیسے روشن اپنی کار اسکیم، روشن سماج خدمت اور روشن اپنا گھر کے تحت سہولیات حاصل کرنے کا بہترین موقع فراہم کرتا ہے۔