سوناکشی سنہا کے ناقابلِ ضمانت وارنٹ گرفتاری جاری

ممبئی: (ویب ڈیسک) بھارتی عدالت نے بالی وڈ اداکارہ سوناکشی سنہا کے خلاف دھوکہ دہی کے مقدمے میں ناقابلِ ضمانت وارنٹ گرفتاری جاری کر دیئے ہیں۔ بھارتی میڈیا کی رپورٹس کے مطابق سوناکشی سنہا نے ایک ایونٹ آرگنائزر سے مبینہ طور پر نئی دہلی میں ہونے والی تقریب کے 37 لاکھ انڈین روپے وصول کئے، لیکن اس میں شریک نہ ہوئیں اور معذرت کر لی۔ رپورٹ میں بتایا گیا کہ آرگنائزر پرمود شرما نے 2019 میں ایک تقریب منعقد کی اور سوناکشی سنہا کو رقم دے کر مدعو کیا۔ آرگنائزر کا کہنا ہے کہ اس نے سوناکشی سنہا کو 37 لاکھ روپے ایڈوانس دیے۔ تاہم اداکارہ تقریب میں شرکت نہ کر سکیں جس کے بعد پرمود نے ان سے اپنی رقم واپس مانگی۔ اردو نیوز کے مطابق ایونٹ آرگنائزر نے الزام عائد کیا کہ اداکارہ کی منیجر نے رقم واپس کرنے سے انکار کر دیا اور سوناکشی سے بارہا رابطہ کرنے کے بعد بھی کچھ حاصل نہ ہوا تو انہوں نے اداکارہ کے خلاف دھوکہ دہی کا کیس درج کروایا۔ بتایا جا رہا ہے کہ سوناکشی سنہا کیس درج ہونے کے بعد مبینہ طور پر مراد آباد آئیں اور اپنا بیان ریکارڈ کروایا۔ اس کے بعد اداکارہ منظر سے غائب ہیں اور عدالت کے بلانے پر بھی نہیں پیش نہیں ہوئیں جس کے بعد مقامی عدالت نے اداکارہ کے ناقابلِ ضمانت وارنٹ گرفتاری جاری کر دیے ہیں۔