ویب ڈیسک: دہلی اسمبلی کے انتخابات میں عام آدمی پارٹی کو بڑا دھچکا،، اروند کیجریوال اپنی روایتی نشست ہار گئے جبکہ بی جے پی 27 سال بعد تخت دہلی پر قبضے کے نزدیک پہنچ گئی۔
تفصیلات کے مطابق بی جے پی نے 70 میں سے 49سے زائد نشستوں پر برتری کیساتھ دہلی میں 27 سال بعد حکومت بنانے کی راہ ہموار کرلی ہے۔
انتخابات میں ووٹر ٹرن آؤٹ 60.42 فیصد رہا، جو 2020 کے مقابلے میں کم تھا۔ بی جے پی کی اس جیت کو دہلی کی سیاست میں ایک بڑا موڑ قرار دیا جا رہا ہے۔
دہلی کے ووٹروں نے عام آدمی پارٹی (اے اے پی) کو اقتدار سے باہر کا راستہ دکھا دیا ہے جو صرف 23 نشستوں پر ہی کامیاب ہوسکی، راہول گاندھی کی جماعت کانگریس ایک بھی نشست پر کامیاب نہ ہوسکی۔
2015 سے دہلی میں برسراقتدار عام آدمی پارٹی کے بڑے چہرے بھی شکست کھاگئے۔ سابق وزیر اعلیٰ اروند کیجریوال نئی دہلی سیٹ سے الیکشن ہار گئے۔ وہیں سابق نائب وزیراعلی منیش سسودیا کو بھی جنگ پورہ سے شکست کا سامنا کرنا پڑا، عام آدمی پارٹی کے کئی دوسرے بڑے لیڈر بھی اپنی نشستیں ہار گئے۔
دوسری جانب وزیراعظم نریندر مودی نے ایک ٹوئٹ میں دہلی انتخابات میں کامیابی کا اعلان کرتے ہوئے کارکنوں اور رہنماؤں کو مبارکباد دی ہے۔