'60 دن میں عالمی جنگ شروع، آغاز پاکستان سے ہوگا'

کراچی: (ویب ڈیسک) پیپلز پارٹی کے سابق رہنما فیصل رضا عابدی نے دعویٰ کیا ہے کہ 28 ستمبر 2021ء کو ہم اس کوڈ پیغام کو توڑ چکے ہیں جس کے مطابق اگلے 60 دن کے اندر عالمی جنگ کے شاخسانے کھل چکے ہیں۔ انہوں نے چونکا دینے والا دعویٰ کرتے ہوئے کہا کہ اس کا آغاز ہی پاکستان سے ہونا ہے۔ یہ تو میں نے پچھلے سال ہی بتا دیا تھا۔ ایران اور پاکستان میں سے کسی ایک کا چناؤ کرنا تھا تو پہلے انہوں نے پاکستان کو چنا ہے۔ یہ 100 فیصد مصدقہ اطلاعات ہیں۔ فیصل رضا عابدی نے ایک نجی ٹیلی وژن کو دیئے انٹرویو میں کہا کہ دو ماہ میں عالمی جنگ شروع ہونے والی ہے اور اس کا آغاز پاکستان سے ہوگا لیکن میں پاکستان کی اس جنگ میں قیادت کروں گا اور اپنے ملک کو بچا کر لے جاؤں گا۔ ان کا کہنا تھا کہ وہ سیاست سے کنارہ کش تھے لیکن اب ریاست کو ضرورت آن پڑی ہے تو وہ اب آگے بڑھ کر اپنا کردار ادا کرنے کے لئے آ گئے ہیں۔ انہوں نے پیپلز پارٹی میں واپسی کی افواہوں کو رد کرتے ہوئے انہوں نے کہا کہ جب اس ملک میں آپ کے ووٹ کی کوئی اہمیت ہی نہیں تو پھر اس عوام کی خدمت کی ضرورت کیا ہے؟ جب سیاست نے ایک ٹیلی فون کال پر چلنا ہے تو یہ جمہوریت نہیں ہے۔ فیصل رضا عابدی نے انکشاف کیا کہ ہمارا دنیا کے اٹھارہ ملکوں میں ایک انٹیلی جنس کا نظام ہے جس کا نام ہے FRA۔ “جب کوئی پاکستان کے خلاف سازش بنی جاتی ہے، الحمدللہ 24 گھنٹے کے اندر ہم اس کو ٹریک کرتے ہیں۔ ہاں مگر یہ سب کوڈ میں چل رہا ہے تو کوڈ کو توڑنے میں ہمیں ایک سے دو ماہ لگ جاتے ہیں۔ اور پھر ہم اس کے سامنے دیوار بن کر کھڑے ہو جاتے ہیں۔ ان کا کہنا تھا کہ اس میں میرے ساتھ محب وطن پاکستانی اور بیرونِ ملک مقیم پاکستانیوں کی ایک بڑی تعداد شامل ہے۔ ان کا کام صرف میرے پاس معلومات لانا ہے اور پھر ہم اس کو اپنی بھٹی میں سے گزار کر ایسی حکمت عملی مرتب کرتے ہیں کہ آج آپ کے جتنے بھی مسائل ہیں ان کے حل ہمارے پاس موجود ہیں۔ جس دن کوئی نسلی آدمی آ گیا اور اس ملک کی کمان سنبھال لی، ہم ایک سال کے اندر ملک کے سب مسائل حل کر دیں گے”۔ فیصل رضا عابدی کا کہنا تھا کہ دنیا میں دو چیزیں ہیں جو عالمی معیشت کا فیصلہ کرتی ہیں۔ ایک ہے تیل اور دوسرا ڈالر۔ ڈالر کی حاکمیت عالمی بنکاری نظام کے ذریعے یہود کے پاس ہے جب کہ تیل کی حاکمیت مسلمانوں کے پاس ہے۔ دنیا میں سات بڑے خاندان ہیں جو ڈالر کو کنٹرول کر رہے ہیں لیکن ایک شخصیت ان 7 خاندانوں کے اوپر بھی ہے اور 9ویں قسط میں اس شخصیت کو میں آپ کے سامنے لے کر آؤں گا۔ وہ خفیہ ہے لیکن میں سامنے لاؤں گا۔ یوٹیوب، فیسبک چینل سب ہمارے بند کر چکے ہیں اور جس کو یہ بند کرنا شروع کر دیں، سمجھ لیں کہ وہ حق پر ہے۔