اقوام متحدہ کے سیکرٹری جنرل انتونیو گوتیرس اسلام آباد پہنچ گئے

اقوام متحدہ کے سیکرٹری جنرل انتونیو گوتیرس نے کہا ہے کہ وہ تباہ کن سیلاب کے بعد پاکستانی عوام سے گہری ہمدردی کے اظہار کے لئے پاکستان پہنچ گئے ہیں۔ جمعہ کو اسلام آباد آمد پر اپنےٹویٹ میں اقوام متحدہ کے سیکرٹری جنرل نے کہا کہ وہ سیلاب متاثرین سے اظہار یکجہتی کے لیے دو روزہ دورے پر پاکستان پہنچ گئے ہیں، وہ اپنے دورے کے دوران سیلاب سے متاثرہ علاقوں کا دورہ اور متاثرین سے ملاقات کریں گے۔ اقوام متحدہ کے سیکرٹری جنرل انتونیو گوتیرس دورے کے دوران وزیراعظم محمد شہبازشریف اور وزیر خارجہ بلاول بھٹو زرداری سے بھی ملاقات کریں گے۔ اس سے قبل اقوام متحدہ کے سیکرٹری جنرل کا سیلاب متاثرین سے اظہار یکجہتی کرنے کے لیے پاکستان پہنچنے پر اسلام آباد ایئرپورٹ پر وزیر مملکت برائے خارجہ امورحنا ربانی کھر اور وزارت خارجہ کے حکام نے استقبال کیا۔ قبل ازیں اقوام متحدہ کے سیکرٹری جنرل نے پاکستان آمد کے موقع پر اپنی ٹویٹ میں موسمیاتی تبدیلی کے باعث پاکستان میں بارشوں اور ہولناک سیلاب سے ہونے والی تباہی سے متاثرہ افراد کی بحالی کے لیے بین الاقوامی برادری سے دل کھول کر مدد کرنے کی اپیل کی ہے۔