لاہور (پبلک نیوز) وزیراعلیٰ پنجاب سردار عثمان بزدار کی زیرصدارت آج وزیراعلیٰ آفس میں اعلیٰ سطح کا اجلاس منعقد ہوا جس میں اورنج لائن میٹرو ٹرین اور میٹرو بس سروس سے متعلقہ امور کا جائزہ لیا گیا۔ وزیراعلیٰ نے پنجاب ماس ٹرانزٹ اتھارٹی کو ٹرین کے سٹیشنز کیلئے بزنس پلان تیار کرنے کی ہدایت کی۔
وزیراعلیٰ نے ای ٹکٹنگ کیلئے سافٹ ویئر بروقت نہ خریدنے اور تنصیب میں تاخیر کی انکوائری کا حکم دیتے ہوئے کہا کہ معاملے کی جامع تحقیقات کرکے 15 روز میں رپورٹ وزیراعلیٰ آفس پیش کی جائے اور اس ضمن میں ذمہ داروں کا بھی تعین کیا جائے۔ وزیراعلیٰ نے اورنج لائن میٹرو ٹرین کے کرائے، بزنس پلان اور دیگر امورطے کرنے کیلئے اعلیٰ سطح کی کمیٹی تشکیل دینے کی ہدایت کی۔
کمیٹی اورنج لائن میٹرو ٹرین سے متعلقہ امور کے بارے میں ٹائم لائن کے ساتھ 15 روز میں رپورٹ پیش کرے گی۔ وزیراعلیٰ عثمان بزدار نے ہدایت کی کہ اورنج لائن میٹرو ٹرین کے آپریشنل اخراجات کو کم کرنے کیلئے جامع پلان تیار کیا جائے اور سٹیشنز پر کمرشل سرگرمیوں کو فروغ دینے کیلئے منفرد انداز میں منصوبہ بندی کی جائے۔وزیراعلیٰ نے اورنج لائن میٹرو ٹرین کے روٹ اورسٹیشنز پر صفائی کے انتظامات مزید بہتر بنانے کی بھی ہدایت کی۔
اجلاس میں لاہور اورنج لائن میٹرو ٹرین کے کرائے کے حوالے سے مختلف تجاویز پر غور پر غور کیا گیا اور ٹرین کا کرایہ سٹیشن ٹو سٹیشن کرنے کی بھی تجویز پیش کی گئی۔ سیکرٹری ٹرانسپورٹ نے اورنج لائن میٹروٹرین اور میٹرو بس سروس کے امور کے بارے میں بریفنگ دی۔
صوبائی وزیر ٹرانسپورٹ جہانزیب خان کھچی،مشیر ڈاکٹر سلمان شاہ، معاون خصوصی برائے اطلاعات ڈاکٹر فردوس عاشق اعوان، چیف سیکرٹری، پرنسپل سیکرٹری وزیراعلیٰ، ایم ڈی پنجاب ماس ٹرانزٹ اتھارٹی، سپیشل مانیٹرنگ یونٹ کے سربراہ اور متعلقہ حکام نے اجلاس میں شرکت کی۔
وزیراعلیٰ عثمان بزدار نے کہا ہے کہ پنجاب کے ہر شہری کو یونیورسل ہیلتھ انشورنس دیں گے۔ دسمبر2021ء تک یونیورسل ہیلتھ کوریج کا ہدف حاصل کریں گے۔ یونیورسل ہیلتھ انشورنس تحریک انصاف کی حکومت کا فلیگ شپ پروگرام ہے۔ پہلے مرحلے میں ساہیوال اورڈیرہ غازی خان ڈویژن کے لوگوں کو یونیورسل ہیلتھ انشورنس فراہم کی جائیگی۔
انہوں نے کہا کہ پاکستان کی تاریخ میں ہیلتھ کیئر کے حوالے سے ایسا بہترین پروگرام کسی حکومت نے نہیں دیا- یونیورسل ہیلتھ کوریج پروگرام سے شہریوں کو معیاری علاج معالجہ کی سہولتیں بالکل مفت میسر آئیں گی اورعوام کو ان کی دہلیز پرمعیاری علاج معالجہ فراہم کریں گے-
وزیراعلیٰ عثمان بزدارنے پنجاب ہیلتھ انییشیٹو مینجمنٹ کمپنی کے بورڈ آف ڈائریکٹرزکو جلد مکمل کرنے کی ہدایت کی ہے۔انہوں نے کہا کہ کورونا ویکسینیشن سینٹرز پربزرگ شہریوں کیلئے بہترین انتظامات کیے گئے ہیں۔ وزیراعلیٰ نے ہدایت کی کہ ہیلتھ ورکرز کے ساتھ بزرگ شہریوں کو بھی کوروناویکسین لگانے کا عمل مزید تیز کیا جائے۔
انہوں نے کہا کہ وزراء کو ہدایت کی گئی ہے کہ وہ اپنے علاقوں میں ویکسینیشن سینٹرز کا وزٹ کریں اور سہولتوں کا جائزہ لیں۔ کورونا کی صورتحال خطرناک ہے۔ ہم سب پرفرض ہے کہ زیادہ سے زیادہ احتیاط کریں۔ کورونا کا پھیلاؤ روکنے کیلئے عوام کا تعاون ناگزیر ہے۔عوام کی زندگیاں بچانے کیلئے ہر ضروری اقدام اٹھائیں گے۔
