سٹاک مارکیٹ میں تیزی کا رجحان، ڈالر مزید سستا ہو گیا

ملکی سیاسی صورتحال کے پیشِ نظر شروع ہونے والا معاشی مندی کا رجحان اب کافی حد تک رک چکا ہے اور وزیراعظم عمران خان کے خلاف تحریک عدم اعتماد کی کامیابی کے بعد پاکستان اسٹاک ایکسچینج میں بھی مثبت رجحان نظر آ رہا ہے۔ ہنڈرڈ انڈیکس میں بھی اضافہ ہوا جو مجموعی طور پر 3.61 فیصد سے زائد رہا، اس دوران مارکیٹ 46000 پوائنٹس سے بھی تجاوز کر گئی۔ اہم بات یہ ہے کہ آج سٹاک ایکسچینج میں شروع سے ہی مثبت رجحان دیکھا گیا۔ ایک موقع پرہنڈرڈ انڈیکس میں 1600 سے زائد پوائنٹس کا اضافہ بھی دیکھا گیا۔ دوسری جانب تیزی سے اوپر جانے والے ڈالر کو بھی بریک لگ گئی، اور امریکی ڈالر سستا ہو گیا۔ انٹر بینک میں ڈالر کی قدر میں مزید 1 روپے 98 پیسے کی کمی واقع ہوئی اور 1 امریکی ڈالر 183 روپے سے بھی نیچے آ گیا ہے۔