ویب ڈیسک : چین میں کسٹم حکام نے ایک شخص کو 100 سے زائد زندہ سانپوں کو اپنی شلوار میں باندھ کر سمگل کرنے کی کوشش کے دوران حراست میں لے لیا۔
رپورٹ کے مطابق چین کے محکمہ کسٹمز نے ایک بیان میں کہ ہےا کہ مسافر (جس کا نام ظاہرنہیں کیا گیا) کو کسٹم افسران نے اُس وقت روک دیا جب وہ نیم خودمختار ہانگ کانگ سے نکل کر سرحدی شہر شینزین میں جانے کی کوشش کر رہا تھا۔
بیان کے مطابق کسٹم حکام کی جانب سے معائنے پر یہ بات سامنے آئی کہ مسافر نے جو پتلون پہن رکھی ہے اس کی جیبوں میں کینوس کے 6 بیگز چپکائے ہوئے تھے اور ان جیبوں کو ٹیپ کے ذریعے بند کیا گیا تھا۔
بیان میں کہا گیا ہے کہ ’جب بیگز کو کھولا گیا تو بیگ میں سے ہر قسم کی شکل، سائز اور رنگ کے زندہ سانپ پائے گئے۔‘
بیان میں کہا گیا ہے کہ افسران نے دودھیا، کارن سمیت 104 سانپوں کو اپنی تحویل میں لے لیا جن میں سے اکثر غیر مقامی نسل کے تھے۔
ایک اور ویڈیو میں دو بارڈر ایجنٹوں کو شفاف پلاسٹک کے تھیلوں میں جھانکتے ہوئے دیکھا جا سکتا ہے جو سرخ، گلابی اور سفید سانپوں سے بھرے ہوئے ہیں۔
چین دنیا میں جانوروں کی سمگلنگ کے سب سے بڑے مراکز میں سے ایک ہے تاہم حکام نے حالیہ برسوں میں اس غیر قانونی تجارت کے خلاف کریک ڈاؤن کیا ہے۔
ملک کے بائیو سکیورٹی اور بیماریوں کے کنٹرول کے قوانین لوگوں کو اجازت کے بغیر غیر مقامی نسلوں کو لانے سے روکتے ہیں۔
کسٹم اتھارٹی نے مذکورہ شخص کی سزا کی وضاحت کیے بغیر کہا کہ ’جو افراد قواعد کی خلاف ورزی کریں گے انہیں قانون کے مطابق سزا دی جائے گی۔‘