کینیڈیا اور امریکا نے مشترکہ کارروائی کرتے ہوئے ناقابل شناخت شے کو مار گرایا

امریکا کے بعد کینیڈا کے فضائی حدود میں بھی داخل ہونے والی ایک ناقابل شناخت شے کو مار گرادیا گیا۔ غیر ملکی خبر رساں ادارے کے مطابق کینیڈا اور امریکا نے مشترکہ کارروائی کرتے ہوئے ایک آبجیکٹ کو الاسکا کی سرحد کے قریب یوکون کے علاقے میں مار گرایا۔ اس حوالے سے کینڈیشن وزیر اعظم جسٹن ٹروڈو نے ٹوئٹر پر بیان میں کہا کہ امریکی اور کینیڈین طیاروں نے مشترکہ طور پر آپریشن میں حصہ لیا۔ انہوں نے کہا کہ امریکی ایف 22 طیارے نے ناقابل شناخت شے کو مار گرایا۔ کینڈین وزیر اعظم کا کہنا تھا کہ ان کی صدر جوبائیڈن سے بات چیت ہوئی ہے، کینیڈین فورسز ناقابل شناخت شے کی باقیات کو ڈھونڈیں گی اور اس کا جائزہ لیں گی۔ گزشتہ روز امریکی ریاست الاسکا میں بھی ایک ناقابل شناخت آبجیکٹ کو گرایا گیا تھا۔قبل ازیں امریکا نے اپنے فضائی حدود میں ایک چینی غبارے کو مار گرایا تھا جس کے بعد امریکا اور چین میں سفارتی تناؤ بڑھ گیا ہے۔