ٹی ٹوئنٹی ورلڈ کپ کے فائنل میچ کا ٹاس مقررہ وقت سے پہلے ہوگا

میلبرن میں کھیلے جانے والے ٹی ٹوئنٹی ورلڈ کپ کے فائنل میچ کا ٹاس کل 8 منٹ قبل ہوگا۔ میلبرن کرکٹ گراؤنڈ میں پاکستان اور انگلینڈ کے درمیان ٹی ٹوئنٹی ورلڈ کپ کے فائنل میچ کا ٹاس مقامی وقت کے مطابق 6 بج کر 22 منٹ پر ہوگا۔جبکہ پاکستانی وقت کے مطابق فائنل میچ کا ٹاس دوپہر 12 بج کر 22 منٹ پر ہوگا۔ ٹاس کے بعد میوزیکل پروگرام ہوگا، جس میں مقامی گلوکار اپنے فن کا مظاہرہ کریں گے۔اس کے علاوہ فائنل میچ کے بعد آتش بازی کا بھی شاندار مظاہرہ کیا جائے گا۔ خیال رہے کہ آسٹریلیا کے محکمہ موسمیات نے اتوار اور پیر کے روز بارش کی پیشگوئی بھی کر رکھی ہے جس سے ٹی ٹوئنٹی ورلڈکپ کا فائنل متاثر ہونے کا بھی خدشہ ہے۔ تاہم آئی سی سی نے پاکستان اور انگلینڈ کا فائنل نتیجہ خیز بنانے کے لیے قوانین میں تبدیلی بھی کر دی ہے اور میچ بارش سے متاثر ہونے کی صورت میں ریزرو ڈے پر اضافی وقت کا دورانیہ 2 گھنٹے سے بڑھا کر 4 گھنٹے کر دیا گیا ہے۔