(ویب ڈیسک ) سیکرٹری لاہور بورڈ رضوان نزیر کا کہنا ہے کہ وزیر اعلیٰ پنجاب مریم نواز شریف کی ہدایت پر پہلی دفعہ سپروائزری کا انتخاب آٹو میشن کے ذریعے ہو گا۔ اس سے کسی غیر متعلقہ افراد کو علم نہیں ہو گا کہ کس کی ڈیوٹی کہاں لگی ہے۔
سیکرٹری لاہور بورڈنے کہا کہ اب ڈیوٹی کا پروسس آٹومیٹک ہو گا۔ چار مارچ سے میٹرک کے امتحانات شروع ہوں گے۔ لاہور ڈویژن میں 920 سینٹر بنائے گئے ہیں، 10250 سے زائد عملہ میٹرک سالانہ امتحانات میں ڈیوٹی سر انجام دے گا۔ 2025 میں نہم جماعت میں 117704 پرائیویٹ طلبہ حاضر ہوں گے۔
رضوان نذیر نے کہا کہ نہم جماعت میں ریگولر 195371 طلبہ امتحان میں حاضر ہوں گے۔دہم جماعت میں 113102 پرائیویٹ اور 142677 طلبہ حاضر ہوں گے۔
ان کا کہنا تھا کہ 2025 میں میٹرک سالانہ امتحانات میں 568854 طلبہ حاضر ہوں گے۔ اس سال پچھلے سال کی نسبت بیس ہزار طلبہ میں اضافہ ہوا ہے۔ پچاس نئے سینٹر بھی اس شامل کئے گئے ہیں۔