(ویب ڈیسک ) آئی سی سی چیمپئنز ٹرافی 2025 میں شرکت کے لیے بھارتی کرکٹ ٹیم دبئی پہنچ گئی ہے۔
تفصیلات کے مطابق بھارتی ٹیم ممبئی سے دبئی انٹرنیشنل ائیرپورٹ پہنچی ہے، دبئی ائیرپورٹ پر شائقین کرکٹ کی کافی بڑی تعداد نے ٹیم کا استقبال کیا، ائیرپورٹ اسٹاف میں شامل شائقین کرکٹ بھی کرکٹ اسٹارز کو دیکھنے اُمڈ آئے۔
بھارتی کرکٹ ٹیم بغیر ذاتی عملے کے دبئی پہنچی ہے، کیونکہ بھارتی کرکٹ بورڈ نے حال ہی میں کھلاڑیوں کے ذاتی شیف اور ہیئر ڈریسرز ساتھ لے جانے پر پابندی عائد کی تھی۔
بھارتی ٹیم میں کپتان روہت شرما، ویرات کوہلی، آل راؤنڈرز ہاردک پانڈیا اور رویندرا جدیجا، جب کہ وکٹ کیپرز رشبھ پنت اور کے ایل راہول نمایاں ہیں۔ دیگر اہم کھلاڑیوں میں کلدیپ یادو، ورون چکرورتی، شریاس آئیر اور فاسٹ بولرز ارشدیپ سنگھ اور ہرشیت رانا شامل ہیں۔
خیال رہےکہ یہ ٹورنامنٹ پہلی بار 1996 کے ورلڈکپ کے بعد پاکستان کی میزبانی میں ہو رہا ہے اور شائقین کرکٹ میں خاصی دلچسپی پیدا کر رہا ہے۔
بھارتی ٹیم اتوار کو آئی سی سی اکیڈمی میں دوپہر کو پریکٹس کرےگی اورکچھ پلیئرز ہوٹل میں فزیکل ٹریننگ سیشن میں حصہ لیں گے۔
بھارت کا پہلا میچ 20 فروری کو بنگلا دیش کے خلاف دبئی انٹرنیشنل کرکٹ اسٹیڈیم میں ہوگا۔