ویب ڈیسک: مقبول اداکار ہ درفشاں سلیم کی بے خبری میں بنائی مختصر ویڈیو وائرل ہونے کے بعد اداکارہ کے مداح اور سوشل میڈیا صارفین نے اداکارہ کی پرائیویسی کا خیال نہ رکھنے پر اظہار برہمی کیا ہے۔
در فشاں سلیم کی وائرل ہونے والی ویڈیو میں اداکارہ کو برطانوی شہر لندن میں پینٹ شرٹ میں دیکھا جا سکتا ہے، ویڈیو میں دیکھا جا سکتا ہے کہ در فشاں سلیم لندن کے ایک چوک پر آتی ہیں، جہاں ایک گلوکار ان کے ہی مقبول ڈرامے عشق مرشد کا گانا گا رہا ہوتا ہے اور اداکارہ ان کی مختصر ویڈیو بناکر دوستوں کے ہمراہ وہاں سے رخصت ہوتی ہیں۔
ویڈیو میں نظر نہ آنا والا شخص مسلسل در فشاں سلیم کا پیچھا کرکے ان کی ویڈیو بناتا ہے اور بظاہر ایسا محسوس ہوتا ہے کہ اداکارہ کو اس بات کا علم نہیں کہ ان کی ویڈیو بنائی جا رہی ہے۔
چند منٹ پر مبنی ویڈیو یوٹیوب اور انسٹاگرام سمیت دیگر پلیٹ فارمز پر وائرل ہوگئی، جس میں در فشاں سلیم کو لندن کی گلیوں اور شاپنگ سینٹرز میں دوستوں کے ہمراہ گھومتے دیکھا جا سکتا ہے۔
تاہم کچھ سوشل میڈیا صارفین نے نشاندہی کی کہ یہ اتفاق نہیں ہوسکتا کہ در فشاں سلیم کے ڈرامے کا گانا ہی گایا جا رہا ہے اوراداکارہ وہاں پر پہنچیں اور کوئی ان کا پیچھا کرکے ویڈیو بناتا رہے۔
لیکن زیادہ تر صارفین نے ویڈیو بنانے والے کو آڑے ہاتھوں لیا اور لکھا کہ ویڈیو بنانے والوں کو شرم آنی چاہیے، دوسروں کی پرائیویسی اور نجی زندگی کا خیال رکھیں۔