عمران خان کی سیکیورٹی سے متعلق مریم نواز کا بڑا بیان

مسلم لیگ ن کی رہنماء مریم نواز شریف نے وزیرداخلہ رانا ثناء اللہ کو مخاطب کرتے ہوئے کہا ہے کہ عمران‌خان کو سیکیورٹی دیں مگر قوم کے مجرم اور سب سے بڑے فتنے کو اسکی اوقات سے باہر مت کریں۔ سماجی رابطوں کی ویب سائٹ ٹوئٹر پر اپنے پیغام میں مریم نواز کا کہنا تھا کہ رانا صاحب!عمران خان سے قتل کی سازش کے ویڈیو ثبوت لیے بغیر اسکو چھوڑنا مت تاکہ اسکے نئے شوشے اور جھوٹ کو ایکسپوز کیا جائے۔ سیکیورٹی دیں مگر قوم کے مجرم اور سب سے بڑے فتنے کو اسکی اوقات سے باہر مت کریں۔ 4 سال میں عوام کے پیسے پر پروٹوکول کی جو لت اسکو لگ گئی ہے وہ وہی مانگ رہا ہے! واضح رہے کہ مختلف تھریٹس کی وجہ سے حکومت نے سابق وزیراعظم عمران خان کی سیکیورٹی کے فول پروف انتظامات کے تحت رینجرز، ایف سی اور پولیس کی بھاری نفری تعینات کر رکھی ہے۔ عمران خان کو مختلف تھریٹس کی روشنی میں ان کی سیکیورٹی کے لئے تھریٹ اسسمنٹ نے اجلاس کئے گئے تھے۔ عمران خان کی سیکیورٹی کے لئے دو اہم اجلاس ہوئے تھے جس کے بعد ان کی سیکیورٹی بڑھائی گئی۔ وفاقی حکام کا کہنا ہے کہ پی ٹی آئی چیئرمین عمران خان کی سیکیورٹی سے متعلق ان کی جماعت کا ایک نمائندہ مقرر کیا جانا ضروری ہے تاکہ اگر کوئی مخصوص دھمکی ہے تو وہ بھی شیئر کی جائے جس کی روشنی میں مزید حفاظتی انتظامات کئے جا سکیں۔ میڈیا رپورٹس کے مطابق اس کے علاوہ بھی عمران خان کی سکیورٹی کو فول پروف بنانے اور پروٹوکول بارے حکومت کی جانب سے واضح احکامات جاری کئے گئے ہیں۔ ذرائع کا کہا ہے کہ اس وقت عمران خان کی رہائشگاہ بنی گالہ کی سیکیورٹی کے لئے ایف سی کے 72 اور اسلام آباد پولیس کے 22 اہلکار تعینات ہیں۔ اس کے علاوہ خیبر پختونخوا حکومت نے چھتیس اور گلگت بلتستان حکومت نے چھ پولیس اہلکار عمران خان کی سیکیورٹی کے لئے دیئے ہوئے ہیں جبکہ عسکری سیکیورٹی کیلئے 9 اور ایس ایم ایس سکیورٹی کے 26 اہلکار بھی بنی گالہ پر ہمہ وقت تعینات ہیں۔ دوران سفر سابق وزیراعظم عمران خان کیساتھ اسلام آباد پولیس کی چار گاڑیاں اور تئیس اہلکار اور رینجرر کی ایک گاڑی اور پانچ مستعد اہلکار موجود ہوتے ہیں۔