انجری کا شکار ہونے والے شاہنواز دھانی کا آپریشن ہوگیا

پاکستان سپر لیگ کی ٹیم ملتان سلطانز کے انجری کے سبب ایونٹ سے باہر ہونے والے فاسٹ بولر شاہنواز دھانی کا آپریشن ہو گیا ہے ۔ تفصیلات کے مطابق پی سی بی میڈیکل پینل کی نگرانی میں کرکٹر شاہنواز دھانی کے دائیں ہاتھ کی انگلی کی سرجری کردی گئی ہے ۔ شاہنواز دھانی نے آپریشن کے بعد سماجی رابطے کی ویب سائٹ ٹوئٹر پر اپنی ٹوئٹ میں فینز کو دعا کی اپیل کرتے ہوئے یہ بتایا کہ میرے ہاتھ کی انگلی کا آپریشن ہوگیا ہے، تمام افراد سے دعاؤں کی درخواست ہے ۔ انہوں نے لکھا کہ میں پی سی بی کے چیف میڈیکل آفیسر ڈاکٹر نجیب سومرو کا مشکور ہوں کہ جنہوں نے مجھے مانیٹر کیا ہے ، آپریشن کے دوران ڈاکٹر نجیب میرے ساتھ موجود رہے میں ان کا شکر گزار رہوں گا ۔ خیال رہے کہ کرکٹر شاہنواز دھانی دائیں ہاتھ کی انگلی میں فریکچر کے سبب پی ایس ایل سے آؤٹ ہوگئے تھے، ملتان سلطانز نے ان کی جگہ نوجوان فاسٹ بولر محمد الیاس کو اسکواڈ میں شامل کرلیا ہے ۔