سچ کبھی چھپتا نہیں، منشیات کے استعمال اور تشدد کے الزامات پر علیزے شاہ کا ردعمل

لاہور:( پبلک نیوز) پاکستان کی نامور اداکارہ علیزے شاہ نے ساتھی اداکارہ منسا ملک کی جانب سے لگائے مبینہ طور پر بدترین تشدد کا نشانہ بنانے کے سنگین الزامات پر لب کشائی کردی ۔ خیال رہے کہ 16 اگست کو ابھرتی ہوئی اداکارہ منسا ملک نے اسلام آباد کے تھانہ ویمن مرکز جی سیون میں علیزے شاہ کے خلاف درخواست جمع کروائی تھی۔ ان کی جانب سے درخواست میں موقف اختیار کیا گیا تھا کہ اداکارہ علیزے شاہ نے ڈرامے کی شوٹنگ کے دوران ان پر جلتا ہوا سگریٹ پھینکا اور انہیں مارنے اور تشدد کرنے کی بھی کوشش کی تھی۔ اداکارہ منسا ملک نے الزام عائد کیا کہ علیزے شاہ نے انہیں کمرے میں جوتیوں کے ساتھ مارا اور اس دوران علیزے منشیات کا استعمال بھی کر رہی تھیں اور انہوں نے اس دوران بہت مشکل سے اپنی جان چھڑائی تھی۔ درخواست میں یہ کہا گیا کہ علیزے شاہ نے منسا ملک کو سنگین نتائج کی دھمکیاں بھی دی ہیں، منسا ملک کی جانب سے یہ دعویٰ بھی کیا گیا تھا کہ علیزے کو ان سے پروفیشنل جیلسی بھی ہے۔ طویل خاموشی کے بعد علیزے شاہ کا ردعمل واقعے کے تین روز بعد علیزے شاہ نے عائشہ جہانگیر ملک نامی خاتون کے انسٹاگرام اکاؤنٹ کی اسٹوری کو ری پوسٹ کرتے ہوئے لکھا کہ ’سچ کبھی چھپتا نہیں‘۔ انسٹاگرام اسٹوری میں لکھا تھا کہ ’ ایک گمنام شخص (جو بیک اسٹیج میں کام کرتا ہے) نے مجھے خفیہ طور پر ایک ایسے واقعے کے بارے میں بتایا کہ جس کا سوشل میڈیا پر تذکرہ کیا جارہا ہے’۔ ان کا کہنا تھا کہ سوشل میڈیا پر یہ خبریں گردش کررہی ہیں کہ ایک ساتھی اداکارہ ( منسا ملک) نے علیزے شاہ پر بدتمیزی کا الزام لگایا ہےجبکہ حقیقت اس کے برعکس ہے کہ ساتھی اداکارہ نے علیزے شاہ کو پہلے تھپڑ رسید کیا تھا اور پھر جسمانی تشدد کا نشانہ بنایاتھا۔ انسٹاگرام اسٹوری پر انہوں نے مزید لکھا کہ ’اس واقعے کے دوران سیٹ پر موجود عملہ اور ساتھی فنکار سمیت تمام لوگ علیزے شاہ کی حمایت کرتے ہیں کیونکہ یہ واقعہ شام 6 بجے کے قریب ہوا تھا اور جب تک شوٹنگ مکمل نہیں ہوگئی علیزے شاہ سب کے سامنے بے عزت ہونے کے باوجود رات 12 بجے سے پہلے سیٹ سے نہیں گئی، یہ ان کے کام کا منہ بولتا ثبوت ہے۔‘ ان کا کہناتھا کہ میرا مشورہ ہے کہ دوسری طرف کی کہانی سنے بغیر سوشل میڈیا پر گردش کرنے والی پر خبر پر یقین نہ کرلیا کریں۔ تاہم عائشہ جہانگیر یا علیزے شاہ کی طرف منسا ملک کے مبینہ طور پر منشیات استعمال کرنے یا تشدد کرنے کے الزامات کی واضح طور پر تردید یا تصدیق نہیں کی گئیہے۔ عائشہ جہانگیر نامی انسٹاگرام صارف کی اسٹوری کو ری پوسٹ کرتے ہوئے اداکارہ علیزے شاہ نے لکھا کہ ’سچ کبھی چھپتا نہیں‘۔