ویب ڈیسک: وزیراعلی پنجاب مریم نوازشریف کے ماحول کو عوام دوست بنانے کے اقدامات میں سے ایک اہم اقدام الیکٹرک بس سروس کا آغاز۔۔۔!! اس شاندار الیکٹرو بس سروس سے روزانہ 17000 افراد مستفید ہونگے اور اس کا کرایہ 20 روپے مقرر کیا گیا ہے، 21 کلو میٹر طویل روٹ کیلئے 42 بس شیلٹر قائم کیئے گئے ہیں۔
پنجاب حکومت نے صوبائی دارالحکومت لاہور میں اپنی پہلی الیکٹرک بس سروس ” الیکٹرو“ کا آغاز کر دیا ہے، جو شہر کے مختلف اہم مقامات پر سفری سہولت فراہم کرے گی۔
پنجاب کی وزیر اعلیٰ مریم نواز نے بدھ کے روز افتتاحی تقریب میں خطاب کرتے ہوئے کہا کہ یہ سروس لاہور ریلوے اسٹیشن سے گرین ٹاؤن تک چلائی جائے گی۔ انہوں نے مزید بتایا کہ اس روٹ پر چلنے والی 27 بسوں کے لیے 98 اسٹاپس کی تعمیر جاری ہے۔
وزیر اعلیٰ کا کہنا تھا کہ اس منصوبے کا مقصد دور دراز کے علاقوں کو شہر کے مرکزی حصے سے جوڑنا ہے، تاکہ عوام کو ” سستی اور جدید“ سفری سہولت فراہم کی جا سکے۔
لاہور میں الیکٹرک بس سروس ” الیکٹرو“ کےروٹس منظرعام پر آگئے:
لاہور میں الیکٹرک بس سروس ” الیکٹرو“ کا آغاز آج (جمعرات) سے کیا جائے گا، جو ریلوے اسٹیشن سے گرین ٹاؤن تک چلے گی۔
بس سروس کے روٹ میں حاجی کیمپ، پولیس لائن، شملہ پہاڑی، روزنامہ جنگ، مسلم لیگ ہاؤس، کلب چوک، گورنر ہاؤس، باغ جناح اور چڑیا گھر شامل ہیں۔
دیگر اہم اسٹاپس میں چیئرنگ کراس، گنگا رام اسپتال، وارث روڈ، عابد مارکیٹ، مزنگ، شمع، اچھرہ، فاضلیہ کالونی، رحمان پورہ، اچھرہ پل، پنجاب کالج اور نیو گارڈن ٹاؤن شامل ہیں۔
کیمپس پل، پنجاب یونیورسٹی گیٹ نمبر 4، ہیلے کالج، آئی بی اے اسٹاپ، شاہ دی کھوئی، راوی چوک، شوق چوک، اکبر چوک، ٹاؤن شپ بازار اور موچی پورہ بھی اس سروس کا حصہ ہوں گے۔
ماڈل روڈ، لنک روڈ، ہنڈا موڑ، گورنمنٹ ایمپلائز سوسائٹی، پنڈی اسٹاپ، رفع یونیورسٹی، نرسری بس اسٹاپ، ہمدرد چوک اور منہاج یونیورسٹی بھی اس روٹ میں شامل ہیں۔
ٹرانسپورٹ ڈیپارٹمنٹ نے کرایہ صرف 20 روپے مقرر کیا ہے، جبکہ روزانہ 17 ہزار افراد کے اس سہولت سے مستفید ہونے کی توقع ہے۔ بس سروس میں مسافروں کی سہولت کے لیے فری وائی فائی، موبائل چارجنگ پورٹس اور سی سی ٹی وی کیمرے بھی نصب کیے گئے ہیں۔
مزید برآں، طلبہ اور خصوصی افراد کے لیے یہ سروس مفت فراہم کی جائے گی۔
تقریب میں پنجاب کے وزیر ٹرانسپورٹ بلال اکبر نے اعلان کیا کہ مزید 500 الیکٹرک بسیں متعارف کروانے کی منصوبہ بندی کی جا رہی ہے، جن میں فیصل آباد اور گوجرانوالہ میں بھی یہ سروس شروع کی جائے گی۔ لاہور میں دو نئے ماس ٹرانزٹ سسٹمز بھی متعارف کروائے جائیں گے۔
وزیر اعلیٰ مریم نواز نے مزید اعلان کیا کہ صوبے کی پہلی ٹرام سروس ٹھوکر نیاز بیگ سے ہربنس پورہ تک چلائی جائے گی۔ انہوں نے ٹرانسپورٹ ڈیپارٹمنٹ کو زیر زمین ٹرانسپورٹ نظام کے لیے بھی اقدامات کرنے کی ہدایت دی۔