ویب ڈیسک: شمالی اور جنوبی وزیرستان میں سیکیورٹی فورسز اور دہشت گردوں میں جھڑپوں کے نتیجے میں 12خوارجی دہشت گرد ہلاک ہو گئے۔
آئی ایس پی آرکے مطابق جھڑپوں میں سیکیورٹی فورسز کے 6 بہادر جوان شہید ہوئے ہیں۔ سیکیورٹی فورسز اور دہشت گردوں کے درمیان جھڑپوں کے 2 واقعات ہوئے، 19 ستمبر کو پاک افغان سرحد پر 7دہشت گردوں کی نقل و حرکت دیکھی گئی۔
آئی ایس پی آر کے مطابق در اندازی کی کوشش کا پتہ چلنے پر سیکیورٹی فورسز نے شمالی وزیرستان کے علاقے سپن وام میں کارروائی کی، افغانستان سے آنے والے در اندازوں کو سیکیورٹی فورسز نے مکمل طور پر گھیرے میں لے لیا۔ سیکیورٹی فورسز اور دہشت گردوں کے درمیان شدید فائرنگ کا تبادلہ ہوا اور سیکیورٹی فورسز نے تمام 7 دہشت گردوں کو جہنم واصل کر دیا۔
آئی ایس پی آر کے مطابق افغانستان سے آنے والے دہشت گردوں کے قبضے سے بڑی مقدار میں اسلحہ اور بارودی مواد برآمد ہوا۔
آئی ایس پی آر کے مطابق لدھا میں دہشتگردوں کا سیکورٹی فورسز کی چیک پوسٹ پر حملہ ہوا جبکہ لدھا میں سیکیورٹی فورسز نے چیک پوسٹ پر حملہ ناکام بناتے ہوئے 5 خارجی دہشت گردوں کو ہلاک کر دیا۔ چیک پوسٹ پر حملے کے دوران شدید فائرنگ کے تبادلے میں دھرتی کے 6 بہادر بیٹے بھی شہید ہوگئے۔
علاقے میں کسی بھی باقی ماندہ خوارج کے خاتمے کے لیے کلیئرنس آپریشنز جاری ہیں۔ پاکستانی سیکیورٹی فورسز دہشت گردی کے ناسور کو جڑ سے ختم کرنے کے لیے پرعزم ہیں اور ہمارے بہادر جوانوں کی قربانیاں ہمارے اس عزم کو مزید مضبوط کرتی ہیں۔
صدر آصف علی زرداری
صدر آصف علی زرداری نےفتنہ الخوارج کے خلاف کارروائیاں کرنے پر سیکیورٹی فورسز کو خراجِ تحسین پیش کیا ہے اور صدر مملکت نے مختلف جھڑپوں کے دوران خوارجی دہشتگردوں کو جہنم واصل کرنے پر فورسز کی تعریف کی اور کہا ہے کہ ملک کیلئے جانوں کا نذرانہ پیش کرنے والے جوانوں کی قربانیاں رائیگاں نہیں جائیں گی،دہشتگردی کے ناسور کو جڑ سے اکھاڑ پھینکنے کیلئے سیکیورٹی فورسز کی کاروائیاں جاری رکھیں گے۔
صدر مملکت نے کہا کہ پوری قوم دہشتگردوں کی سرکوبی کیلئے سیکیورٹی فورسز کے ساتھ ہے،صدر مملکت کا شہداء کے لواحقین کے ساتھ اظہارِ تعزیت ، شہداء کیلئے بلندی درجات کی دعا کی۔
وفاقی وزیرداخلہ محسن نقوی
وفاقی وزیرداخلہ محسن نقوی نے جنوبی و شمالی وزیرستان میں فتنہ الخوارج کے 12 دہشتگردوں کو جہنم واصل کرنے پر سکیورٹی فورسز کی تحسین پیش کیااور جھڑپوں میں شہید ہونےوالے سکیورٹی فورسز کے 6 بہادر جوانوں کو خراج عقیدت پیش کیا۔
وزیر داخلہ محسن نقوی نے کہا ہےکہ فتنہ الخوارج کے دہشتگردوں نے رات کی تاریکی میں بزدلانہ حملہ کیا،پاکستان کی سکیورٹی فورسز کے 6 جری جوانوں نے وطن پر جان نچھاور کرکے خوارجی دہشتگردوں کو عبرتناک انجام تک پہنچایا۔ خوارجی دہشتگردوں کے مذموم عزائم ناکام بنانے والے سکیورٹی فورسز کے جوانوں کو سلام پیش کرتے ہیں۔شہداء ہمارے لئے باعث افتخار اور ہمارے سروں کا تاج ہیں۔
محسن نقوی نے کہا ہے کہ شہداء کی عظیم قربانیوں کو فراموش نہیں کر سکتے۔فتنہ الخوارج کے دہشتگردوں کا سر کچلنے کے لیے قوم کے پختہ عزم کو شکست نہیں دی جا سکتی۔شہداء کے خاندانوں کے ساتھ کھڑے ہیں اور ان کے دکھ میں برابر کے شریک ہیں۔قوم دہشتگردی کے ناسور سے نمٹنے کیلئے سکیورٹی فورسز کے ساتھ ہے۔