آزاد کشمیر : پاک فوج کی گاڑی کو حادثہ ، 9 جوان شہید ،4 زخمی

راولپنڈی : پاک فوج کی گاڑی کو آزاد کشمیر کے ضلع باغ کےعلاقے شجاع آباد کے قریب افسوسناک حادثہ پیش آیا جس کے نتیجے میں 9 جوان شہید اور 4 زخمی ہوگئے۔ پاک فوج کے شعبہ تعلقات عامہ ( آئی ایس پی آر) کی جانب سے جاری کردہ بیان کے مطابق زخمیوں کو فوری طور پر سی ایم ایچ راولپنڈی منتقل کیا گیا، تمام شہدا کی نماز جنازہ منگلا گیریژن میں ادا کر دی گئی۔ کور کمانڈر راولپنڈی اور دیگر فوجی حکام نے نماز جنازہ میں شرکت کی۔ شہدا کے جسد خاکی اپنے اپنے آبائی علاقوں میں روانہ کر دیے گئے۔ وزیراعظم شہباز شریف نے آزاد کشمیر کے علاقے باغ کے قریب فوجی گاڑی کو حادثے پر رنج و غم اور افسوس کا اظہار کیا ہے، وزیراعظم نے 9 شہید ہونے والے جوانوں کے اہل خانہ سے ہمدردی کا اظہار بھی کیا۔ وزیر اعظم شہباز شریف نے کہا کہ مادر وطن کے دفاع کا عظیم فرض نبھاتے شہید ہونے والے بیٹوں کو قوم سلام پیش کرتی ہے۔ وزیراعظم نے شہدا کے بلندی درجات اور لواحقین کے لئے صبر جمیل کی دعا کی، وزیراعظم نے زخمی جوانوں کی جلد صحت یابی کی دعا بھی کی۔