(ویب ڈیسک ) ذرائع کا کہنا ہے کہ مولانا فضل الرحمان نے گرینڈ اپوزیشن الائنس میں باضابطہ شمولیت کے حوالے سے انکار کردیا۔
گرینڈ اپوزیشن الائنس بنانے کا خواب تاحال ادھورا ہے، ذرائع کا کہنا ہے کہ مولانا فضل الرحمان نے گرینڈ اپوزیشن الائنس میں باضابطہ شمولیت کے حوالے سے انکار کردیا ہے۔
مولانا فضل الرحمان کے پی ٹی آئی کے حوالے سے تحفظات تاحال برقرار ہیں۔
جے یو آئی کے رہنما کامران مرتضیٰ نے سوشل میڈیا پر گرینڈ الائنس پرتحفظات کا اعلان کردیا ۔انہوں نے بیان میں کہا کہ گرینڈ الائنس کا حصہ بننے کے لیے تحفظات اسد قیصر کو بتائے تھے، پی ٹی آئی کی جانب سے 15 روز گزرنے کے باوجود بھی جواب نہیں آیا۔
کامران مرتضیٰ نے کہا کہ ہم نے پی ٹی آئی کے ساتھ ورکنگ ریلیشن شپ تو بنا لیا لیکن جب تک ہمارا ورکر اور قیادت مطمئن نہیں ہوتا ہم آگے نہیں بڑھ سکتے، مولانا غفور حیدری کی سربراہی میں ہمارا وفد اپوزیشن جماعتوں کی کانفرنس میں شرکت کرے گا۔