ویب ڈیسک: وزیر اعلیٰ بلوچستان میر سرفراز بگٹی نے اپوزیشن لیڈر عمر ایوب کے حالیہ بیانات پر سخت ردعمل دیتے ہوئے انہیں ایک بار پھر بلوچستان کے دورے کی دعوت دی۔
سماجی رابطے کی ویب سائٹ پر جاری اپنے بیان میں وزیر اعلیٰ بلوچستان نے کہا’ آپ نے بلوچستان کے 8 اضلاع کی علیحدگی کی بات کی تھی، میں نے کہا تھا کہ آئیں، پورا بلوچستان دکھاتا ہوں اور گزارش کی تھی کہ اسے اپنی گندی سیاست کے لیے استعمال نہ کریں۔ مگر آپ نے پھر بات کا رخ موڑ کر سیاست کرنے کی کوشش کی۔ دوبارہ کہتا ہوں ’خدارا بلوچستان کو اپنی سیاست سے دور رکھیں‘‘!
وزیر اعلیٰ سرفراز بگٹی نے اپوزیشن لیڈر کو براہ راست مخاطب کرتے ہوئے مزید کہا’ گزشتہ روز میں نے ذاتی طور پر آپ کو فون کرکے بلوچستان کی صورتحال سے آگاہ کیا، لیکن شاید آپ سمجھنے میں ناکام رہے۔ بطور اپوزیشن لیڈر، میں آپ کو ایک بار پھر بلوچستان کے دورے کی دعوت دیتا ہوں تاکہ آپ rhetoric کے بجائے حقائق پر بات کر سکیں!‘‘
واضح رہے کہ اپوزیشن لیڈر عمر ایوب گزشتہ دو روز سے بلوچستان کی امن و امان کی صورتحال کو بنیاد بنا کر مختلف بیانات دے رہے ہیں، جن پر حکومت بلوچستان کی جانب سے شدید ردعمل سامنے آیا ہے۔