(ویب ڈیسک ) ابوظہبی کے ولی عہد شہزادہ شیخ خالد بن محمد بن زید النہیان کو نشان پاکستان سے نواز دیا گیا۔
قبل ازیں ابوظہبی کے ولی عہد اسلام آباد میں وزیرِ اعظم ہاؤس پہنچے تھے جہاں انہیں گارڈ آف آنر پیش کیا گیا۔ اس موقع پر دونوں ممالک کے قومی ترانے بجائے گئے۔
اس دوران مسلسل بارش ہوتی رہی اور وزیرِ اعظم شہباز شریف نے معزز مہمان ابوظہبی کے ولی عہد شہزادہ شیخ خالد بن محمد بن زید النہیان کو بھیگنے سے بچانے کے لیے خود چھتری تھامے رکھی۔
خیال رہے کہ ابوظہبی کے ولی عہد شہزادہ شیخ خالد بن محمد بن زید النہیان پاکستان کے سرکاری دورے پر آج اسلام آباد پہنچے۔ صدرِ مملکت آصف علی زرداری اور وزیرِاعظم شہباز شریف نے نور خان ایئر بیس پر ابوظہبی کے ولی عہد کا پرتپاک استقبال کیا۔
خاتونِ اوّل آصفہ بھٹو زرداری، نائب وزیرِ اعظم اسحاق ڈار اور وفاقی وزراء بھی معزز مہمان کا استقبال کرنے کے لیے ایئر بیس پر موجود تھے۔