'عمران خان کی باتیں سن کر دل کرتا ہے ایک بار گرفتار کرنا چاہیے'

وفاقی وزیر داخلہ رانا ثناء اللہ نے کہا ہے کہ عمران خان کی گرفتاری کے خلاف ہوں لیکن ان کی باتیں سن کر ذہن بنتا ہے کہ ایک مرتبہ گرفتار کرنا چاہیے۔ پاکستان مسلم لیگ (ن) کے مرکزی رہنما رانا ثنا اللہ نے سابق وزیراعظم میاں نواز شریف سے ملاقات کے بعد گفتگو کرتے ہوئے کہا کہ پی ٹی آئی رہنما فواد چودھری کی گرفتاری سیاسی انتقام نہیں ہے۔انہوں نے واضح طور پر کہا کہ فواد چودھری کے خلاف ایف آئی آرسیکریٹری الیکشن کمیشن کی درخواست پر درج ہوئی ہے۔ رانا ثناء اللہ کا کہنا تھا کہ پاکستان مسلم لیگ (ن) کے قائد میاں نواز شریف سے آج ہدایات لے کر کل پاکستان کے لیے روانہ ہوں گا۔