ویب ڈیسک :لوک سبھا میں حلف لینے کے بعد ’جئے فلسطین‘ کے نعرے کے خلاف احتجاج میں آل انڈیا مجلس اتحاد المسلمین (اے آئی ایم آئی ایم) کے سربراہ اسد الدین اویسی کی دہلی کی رہائش گاہ پر کالی سیاہی پھینکے جانے کا واقعہ سامنے آیا ہے۔
کل ہند مجلس اتحادالمسلمین کے رکن پارلیمنٹ اویسی نے خود اس واقعہ کی جانکاری دی ہے۔ بتایا جا رہا ہے کہ اویسی اپنے اہل خانہ کے ساتھ گھر سے باہر تھے اور جب وہ واپس آئے تو دیکھا کہ رہائش گاہ پر کالی سیاہی پھینکی گئی تھی۔ اس کے بعد انہوں نے دہلی پولیس کو واقعہ کی اطلاع دی۔
دہلی پولیس ذرائع کے مطابق جمعرات کو تقریباً 9 بجے ایم پی اویسی کی رہائش گاہ کے نام کی پلیٹ کو سیاہ کر دیا گیا اور کچھ پوسٹر بھی لگائے گئے۔
اویسی نے ٹویٹ میں کہا ہے کہ آج کچھ نامعلوم شرپسندوں نے کالی سیاہی کے ساتھ میرے گھر میں توڑ پھوڑ کی۔ میں اب گنتی گنوا چکا ہوں کہ میری دہلی کی رہائش گاہ کو کتنی بار نشانہ بنایا گیا ہے۔ انہوں نے وزیر داخلہ اور لوک سبھا کے اسپیکر اوم برلا سے کہا ہے کہ براہ کرم ہمیں بتائیں کہ ارکان پارلیمنٹ کی حفاظت کی ضمانت دی جائے گی یا نہیں۔ مجھے کوئی ڈر نہیں لگتا۔ کچھ سیاہی پھینکنے یا کچھ پتھر پھینکنے کے بعد نہ بھاگیں۔
پولیس اس پورے معاملے کی تحقیقات میں مصروف ہے۔ پولیس سی سی ٹی وی فوٹیج کی جانچ کر رہی ہے تاکہ یہ حملہ میں ملوث افراد کی شناخت ہو سکے۔
کل ہند مجلس اتحادالمسلمین کاردعمل
کل ہند مجلس اتحادالمسلمین کے لیڈر وارث پٹھان نے ٹویٹ کرتے ہوئے کہا کہ آج پھر کچھ غنڈوں نے اویسی جی کے دہلی والے گھر پر کالی سیاہی اور پتھر پھینکے ہیں۔ ان کاکہنا تھا کہ جب ملک کی راجدھانی دہلی میں 5 بار کا رکن پارلیمنٹ محفوظ نہیں ہے تو پھر ملک کا عام شہری کیسے محفوظ رہے گا؟ ہم چاہتے ہیں کہ جن غنڈوں نے اس بزدلانہ حرکت کا ارتکاب کیا ہے انہیں فی الفور گرفتار کرکے سخت سے سخت سزا دی جائے۔