مریم اورنگزیب کا عمران خان کو 2023 تک انتظار کا مشورہ

اسلام آباد: وزیراطلاعات مریم اورنگزیب نے سابق وزیر اعظم عمران خان کو چپ کر کے بیٹھنے اور 2023 تک انتظار کرنے کا مشورہ دے دیا۔

وفاقی وزیر اطلاعات مریم اورنگزیب نے کہا کہ عمران صاحب شہباز شریف کی کارکردگی سے ڈرتے ہیں ، عمران صاحب کو پتہ ہے کہ شہباز شریف اسی محنت اورتوجہ سے کام کرتے رہے تو مہنگائی کم ہوجائے گی، عمران صاحب کو پتہ ہے کہ شہباز شریف معیشت ٹھیک کر دیں گے، عمران صاحب کو پتہ ہے کہ شہباز شریف تمام ممالک سے پاکستان کے بگاڑے گئے تعلقات بھی ٹھیک کر دیں گے۔

مریم اورنگزیب نے کہا کہ عمران صاحب کو یقین ہے کہ شہبازشریف کو کام کرنے دیا تو پاکستان میں سرمایہ کاری واپس لے آئیں گے، شہباز شریف، ان شااللہ، نوجوانوں کو روزگار دیں گے، احتساب ،ریاست مدینہ ،سازش کے بیانیے دفن ہونے کے بعد عمران صاحب کا نیا بیانیہ ڈیڑھ ماہ کی کارکردگی بن گیا ہے، اپنی نالائقی، نااہلی ، کرپشن اور سیاسی منافقت کا چہرہ آئینے میں دیکھیں اور پھر تقریر کیا کریں۔

وزیر اطلاعات کا کہنا تھا کہ چُپ کر کے گھر بیٹھیں اور 2023 میں مزید مسترد ہونے کا انتظار کریں، شہباز شریف آپ کی تباہ کی ہوئی معیشت سنبھالیں گے اور آپ کے پھیلائے ہوئے فتنے کا بھی خاتمہ کریں گے۔

انہوں نے کہا کہ 2014 میں کنٹینر پر بھی نواز شریف، شہباز شریف، حکومت میں بھی نواز شریف، شہباز شریف، اب پھر کنٹینر پہ نواز شریف، شہباز شریف۔ شہباز شریف آپ کی تباہ کی ہوئی معیشت کو ٹھیک کر رہے ہیں، آپ کی لگائی مہنگائی ،بے روزگاری اور معاشی تباہی کی آگ شہبازشریف بجھا رہے ہیں، چار سال میں معاشی تباہی اور مہنگائی لانے والا ڈیڑھ ماہ کا حساب مانگ رہا ہے؟۔

اس خبر پر اپنی رائے کا اظہار کریں

اپنا تبصرہ بھیجیں