دوسرا ون ڈے: پاکستان نے ویسٹ انڈیز کو 120 رنز سے ہرا دیا

پاکستان نے ویسٹ انڈیز کو دوسرے ایک روزہ بین الاقوامی کرکٹ میچ میں با آسانی 120 رنز سے شکست دے کر تین میچوں کی سیریز میں 2-0 کی فیصلہ کن برتری حاصل کر لی ہے۔ گرین شرٹس نے پہلے بیٹنگ کرتے ہوئے مقررہ اوورز میں 8 وکٹوں کے نقصان پر 275 رنز کا مجموعہ ترتیب دیا۔

جواب میں کالی آندھی کی ٹیم مطلوبہ ہدف کے تعاقب میں 32.2 اوورز میں 155 رنز بنا کر پویلین لوٹ گئی، محمد نواز کی جادوئی سپن بائولنگ کے سامنے ویسٹ انڈین ٹیم کی مضبوط بیٹنگ لائن اپ لڑکھڑا گئی، کوئی بھی بیٹر زیادہ دیر تک وکٹ پر نہ ٹھہر سکا، بروکس 42 رنز کے ساتھ نمایاں رہے، محمد نواز میچ کے بہترین کھلاڑی قرار پائے۔

جمعہ کو ملتان کرکٹ سٹیڈیم میں کھیلے گئے دوسرے ایک روزہ بین الاقوامی کرکٹ میچ میں پاکستانی ٹیم کے کپتان بابراعظم نے ٹاس جیت کر پہلے بیٹنگ کا فیصلہ کیا تو میزبان ٹیم نے مقررہ اوورز میں 8 وکٹوں پر 275 رنز بنائے، کپتان بابراعظم 77 اور امام الحق 72 رنز بنا کر نمایاں رہے، فخرزمان 17، محمدرضوان 15،محمدحارث 6، محمدنواز 3، شاداب خان اور خوشدل شاہ 22،22 رنز بنا کر آئوٹ ہوئے، محمد وسیم 17 اور شاہین شاہ آفریدی 15 رنز بنا کر ناٹ آئوٹ رہے.

عقیل حسین نے 3 جبکہ الزاری جوزف اور اینڈرسن فلپ نے دو، دو وکٹیں لیں۔ جواب میں ویسٹ انڈین ٹیم مطلوبہ ہدف حاصل کرنے میں ناکام رہی اور پوری ٹیم 33ویں اوور میں 155 رنز پر ڈھیر ہو گئی، 4 کے سکور پر شاہین شاہ آفریدی نے شائی ہوپ کو آئوٹ کر کے ٹیم کو پہلی کامیابی دلوائی، ہوپ 4 رنز بنا کر چلتے بنے، اس موقع پر بروکس نے کائل میئرز کا ساتھ دیا،دونوں بیٹرز نے مل کر سکور 71 تک پہنچایا.

یہ پارٹنرشپ پاکستان کیلئے خطرہ بن گئی تھی کہ اس موقع پر محمدوسیم نے کائل میئرز کو آئوٹ کر کے اہم پارٹنرشپ توڑ دی، میئرز 33 رنز بنا سکے، اگلے اوور میں نواز نے برینڈن کنگ کو کھاتہ کھولے بغیر پویلین کی راہ دکھائی، 102 کے مجموعی سکور پر کالی آندھی کی چوتھی وکٹ گری جب بروکس 42 رنز بنا کر نواز کی گیند کا نشانہ بنے.

اس کے بعد مہمان ٹیم کا کوئی بھی بیٹر زیادہ دیر تک وکٹ پر نہ ٹھہر سکا اور پوری ٹیم 155 رنز پر ڈھیر ہو گئی، کپتان نیکولاس پوران 25، روومان پاویل 10، روماریو ایک، الزاری جوزف 6، ہیڈن والش اور اینڈرسن فلپ ایک، ایک رن بنا سکے، نواز نے 18 رنز کے عوض 4 کھلاڑیوں کو آئوٹ کیا، محمدوسیم جونیئر نے تین، شاداب خان نے دو اور شاہین آفریدی نے ایک وکٹ لی۔

واضح رہے کہ پاکستان نے ویسٹ انڈیز کو پہلے ون ڈے میں پانچ وکٹوں سے ہرایا تھا، دونوں ٹیموں کے درمیان آخری ایک روزہ میچ کل اتوار کو کھیلا جائے گا۔

اس خبر پر اپنی رائے کا اظہار کریں

مزید پڑھیں

نادرا اب 30 شہروں میں پاسپورٹ بھی بنائے گا
190 ملین پاونڈز کیس: نیب نے 22اہم رہنماوں کیخلاف تحقیقات تیز کر دیں
پی سی بی سنٹرل کنٹریکٹ میں وسیع پیمانے پر تبدیلیوں کا امکان ہے، ذرائع
جناح ہاؤس لاہور پر حملہ آور نوجوان شر پسند کے ہوش رُبا انکشافات
چودھری پرویز الہٰی کو اینٹی کرپشن کورٹ گوجرانوالہ میں پیش کردیا گیا
نگران حکومتیں صرف چار مہینوں کا بجٹ دیں گی،احسن اقبال

اپنا تبصرہ بھیجیں