مسائل میں ڈوبے ملک کو بچانے کیلئے ہمیشہ ’’شیر‘‘ کو ہی آنا پڑتا ہے

لاہور: مسلم لیگ ن کی سینئر نائب صدر مریم نواز نے کہا ہے کہ مسائل میں ڈوبے ملک کو بچانے کے لئے ہمیشہ ’’شیر‘‘ کو ہی آنا پڑتا ہے ۔

تفصیلات کے مطابق چیف آرگنائزر مریم نواز کی زیر صدارت پاکستان مسلم لیگ ن کا مرکزی تنظیمی اجلاس ہوا ہے ، جس میں پرویز رشید ، خواجہ آصف اور رانا ثناءاللہ سمیت رہنما شریک ہوئے ہیں ، اجلاس میں بھرپور تنظیمی کنونشن پر ڈویژن کے عہدیداروں کی کارکردگی کو سراہا بھی گیا ہے ۔

مریم نواز کا اس موقع پر کہنا تھا کہ الیکشن ہو یا فسطائیت کا مقابلہ ہو گوجرانوالہ اس میں سب سے آگے ہے ، گوجرانوالہ ٹیم نے پارٹی کی دیگر ڈویژنز کو چیلنج کر دیا ہے ، یقین ہے کہ پارٹی کے ڈویژنز اس چیلنج کو قبول کریں گے ۔

پاکستان مسلم لیگ (ن) گوجرانوالہ ڈویژن کی مرکزی تنظیم کا اجلاس شروع

سینئر نائب صدر اور چیف آرگنائزر مریم نواز اجلاس کی صدارت کر رہی ہیں

پارٹی کے مرکزی سینئر راہنما خواجہ آصف، پرویز رشید اور پارٹی کے پنجاب کے صدر رانا ثناء اللہ خاں بھی اجلاس میں شریک ہیں pic.twitter.com/VH2ULRDhMx

— PMLN (@pmln_org) March 4, 2023

مریم نواز نے کہا کہ ملک جب مسائل میں ڈوب جاتا ہے تب ہی نوازشریف اور شہباز شریف کو آنا پڑتا ہے، ہمیشہ کی طرح شیر ہی قوم کو مسائل اور انہیں پیدا کرنے والے گیدڑوں سے نجات دلائے گا۔

ان کا کہنا تھا کہ پتلی تماشہ کرنے والے گھروں میں قید ہو چکے ہیں ، سازشیوں کی سازش ہے کہ معیشت نہ سنبھلے مگر ہم لوڈشیڈنگ کے اندھیروں کی طرح معاشی اندھیرے بھی ختم کریں گے ۔

اجلاس کے دوران پارٹی قائدین کا کہنا تھا کہ مریم نواز کارکنوں کی آواز بن چکی ہیں ۔