بابائے حریت سید علی گیلانی داعی اجل کو لبیک کہہ گئے

ویب ڈیسک: حریت رہنما سید علی گیلانی انتقال کر گئے. مقبوضہ کشمیر کی سابق وزیر اعلیٰ محبوبہ مفتی نے ٹوئٹر پیغام کے ذریعہ اظہار تعزیت کیا. انھوں نے لکھا کہ گیلانی صاحب کے انتقال کی خبر سے دکھ ہوا۔ ہوسکتا ہے کہ ہم زیادہ تر چیزوں پر متفق نہ ہوں لیکن میں ان کی ثابت قدمی اور ان کے عقائد پر قائم رہنے کے لیے ان کا احترام کرتی ہوں۔ اللہ تعالٰیٰ ان کو جنت الفردوس میں اعلیٰ مقام عطا فرمائے اور ان کے اہل خانہ اور صبر جمیل عطا فرمائے۔ کل جماعتی حریت کانفرنس جموں و کشمیر کے آفیشل ٹوئٹر ہینڈل سے اطلاع دی گئی کہ انتہائی افسوسناک خبر محترم سید علی شاہ گیلانی صاحب وفات پا گئے ہیں انا للہ وانا الیہ راجعون. کشمیر میڈیا سروس کے مطابق ان کا انتقال 92 سال کی عمر میں سری نگر میں واقع اپنی رہائش گاہ پر ہوا۔ ان کی وفات کی تصدیق خاندان کے ایک فرد کی جانب سے کی گئی ہے۔ خیال رہے کہ گزشتہ برس کے آخری دنوں میں بھی ان کے انتقال کی خبریں گردش کر رہی تھیں جن کی اہل خانہ کی جانب سے تردید کر دی گئی تھی.