پبلک نیوز: (شکیل خان) آئی سی سی ٹی ٹوئنٹی ورلڈ کپ 2024 کے سلسلہ میں نیویارک کا نساؤ کاؤنٹی انٹرنیشنل کرکٹ اسٹیڈیم تکمیل کے آخری مراحل میں پہنچ گیا۔ آئی سی سی نے اسٹیڈیم کی تازہ ترین ویڈیو جاری کی ہے۔
تفصیلات کے مطابق ایسٹ اور ویسٹ اسٹینڈز مکمل ہونے کے قریب ہیں۔ جس میں 24 ہزار تماشائیوں کے بیٹھنے کی گنجائش ہے۔ نارتھ اور ساؤتھ اینڈز پر پریمیئم ہوسپیٹیلیٹی اور میڈیا پویلینز کی تعمیر جاری ہے۔
بتایا گیا ہے کہ اسٹیڈیم میں انڈیا کے تمام گروپ میچز ہوں گے۔ میگا ایونٹ کا سب سے بڑا مقابلہ روایتی حریفوں پاکستان اور بھارت کے درمیان 9 جون کو ہوگا۔
آئی سی سی ہیڈ آف ایونٹس کرس ٹیٹلے کا کہنا ہے کہ خوشی ہے کہ تعمیراتی کام پلان کے مطابق چل رہا ہے۔ نساؤ کرکٹ اسٹیڈیم متاثر کن ہے۔ ایکشن میں دو ماہ سے بھی کم وقت ہے۔ فینز اب بھی ورلڈ کپ کے میچز کی ٹکٹ حاصل کرسکتے ہیں۔
جمعرات کو ہر میچ کے محدود ٹکٹس مزید جاری کیے جائیں گے۔