شہر قائد میں رہنے والوں کیلئے خوشخبری، جدید بسوں کی نئی کھیپ کراچی پہنچ گئی

کراچی والوں کے لئے خوشی کی خبر ہے کہ پیپلزبس سروس کےنئی بسوں کی کھیپ کراچی پہنچ گئی ہے۔ پیپلز پارٹی کے رہنما اور سابق صوبائی وزیر شرجیل انعام میمن نے سماجی رابطوں کے پلیٹ فارم ایکس (سابقہ ٹوئٹر) پر اپنے پیغام میں بتایا ہے کہ بسوں کی نئی کھیپ کراچی پہنچ چکی ہے، یہ بسیں پیپلز پارٹی کی سندھ حکومت نے خریدی تھیں۔ پی پی رہنما نے اپنے پیغام میں کہا کہ یہ نئی بسیں پیپلز بس سروس کے دوسرے مرحلے میں کراچی پہنچی ہیں، جس کے بعد شہر قائد میں رہنے والے بہترین ٹرانسپورٹ اور کم کرایے کے ساتھ شان دار سروس سے مستفید ہوں گے۔ انہوں نے کہا کہ نئی بسیں عوام کی سہولت کے لیے چند دنوں میں سڑکوں پر ہوں گی۔ خیال رہے کہ پیپلز پارٹی کے رہنما شرجیل انعام میمن نے اپنے پیغام میں یاد دہانی کرائی تھی کہ بھولنا نہیں یہ بسیں پیپلز پارٹی کی سندھ حکومت نے خریدی تھیں اور بلاول بھٹو زرداری کی ہدایات پر بسوں کی خریداری کی گئی تھی۔