(ویب ڈیسک) تحریک انصاف کے حمایت یافتہ آزاد امیدواروں کے مستقبل کا معاملہ، الیکشن کمیشن نے سلمان اکرم راجہ کی درخواست مسترد کردی۔
تفصیلات کے مطابق الیکشن کمیشن نے 2 فروری کو محفوظ کیا فیصلہ سنادیا، محفوظ فیصلہ ڈی ڈی لاء صائمہ جنجوعہ نے پڑھ کر سنایا، الیکشن کمیشن نے فارم 33 پر سلمان اکرم راجہ کی پارٹی ظاہر کرنے کی درخواست مسترد کر دی۔
چیف الیکشن کمشنر کی سربراہی میں پانچ رکنی بینچ نے درخواست پر فیصلہ محفوظ کیا تھا، فیصلے میں کہا گیا کہ امیدوار کو انتخابی نشان دیا گیا جو آزاد امیدواروں کو دیا گیا ،جس پارٹی سے امیدوار منسلک ہیں ان کو انتخابی نشان واپس لے لیا گیا۔
سلمان اکرم راجہ نے رولز 94کے تحت خود کو پی ٹی آئی کاامیدوار درج کرنے کی استدعا کی تھی۔فارم 33 امیدواروں کے ناموں کے مندرجات پر مشتمل فارم ہوتا ہے اور سلمان اکرم راجہ کے فارم 33 پر ان کی پی ٹی آئی سے وابستگی درج نہیں ہے۔