'اچانک ورلڈکپ میں لذت واپس آگئی' ہربھجن سنگھ

بھارت کے سابق کرکٹر ہربھجن سنگھ نے پاکستان کے سیمی فائنل میں کوالیفائی کرنے پر کہا ہے کہ 'اچانک ورلڈکپ میں لذت واپس آگئی' ہے۔ تفصیلات کے مطابق سماجی رابطے کی ویب سائٹ ٹوئٹر پر سابق بھارتی کرکٹر ہربھجن سنگھ نے لکھا ہے کہ 'پاکستان کے سیمی فائنل میں کوالیفائی کرنے کے ساتھ ہی اچانک ورلڈکپ میں لذت واپس آگئی ہے'۔ انہوں نے اپنی ٹوئٹ میں سوال بھی کیا ہے کہ 'اگر پاکستان اور بھارت کا فائنل ہو تو کیسا رہے گا؟'سابق کرکٹر ہربھجن سنگھ کی ٹوئٹ سوشل میڈیا پر خاصی وائرل ہے جس پر پاکستانی مداحوں سمیت بھارت کے مداح بھی تبصرے کررہے ہیں۔ خیال رہے کہ 6 نومبر اتوار کا دن پاکستان کے کرکٹ کے مداحوں کے لیے انتہائی اہم تھا جس کی وجہ یہ تھی کہ دن کے آغاز پر ہی نیدرلینڈز نے جنوبی افریقا کو 13 رنز سے شکست دے کر اپ سیٹ کیا تھا ، اس طرح پاکستان کے سیمی فائنل میں پہنچنے کی راہ بھی ہموار ہو گئی تھی۔ اس کے بعد پاکستان نے بنگلادیش کو شکست دے کر ٹی ٹوئنٹی ورلڈکپ کے لیے کوالیفائی کرلیا تھا۔