پی ٹی آئی کے 43 ارکان اسمبلی کے استعفے منظور کرنے کا حکم معطل

لاہور ہائیکورٹ نے پاکستان تحریک انصاف ( پی ٹی آئی ) کے 43 اراکین کے استعفے منظور کرنے کا اسپیکر کا حکم معطل کردیا ہے ۔ تفسیلات مطابق لاہور ہائیکورٹ کے جسٹس شاہد کریم نے پاکستان تحریک انصاف کے ایم این ایز کی درخواستوں کی سماعت کی ، جس کے بعد عدالت نے الیکشن کمیشن سمیت دیگر فریقین کو نوٹسز جاری کردیے ہیں ۔ ریاض فتیانہ سمیت سابق 43 ارکان قومی اسمبلی کی طرف سے بیرسٹر علی ظفر پیش ہوئے تھے ، پی ٹی آئی کے وکیل بیرسٹر علی ظفر کا دلائل دیتے ہوئے کہنا تھا کہ استعفے منظور کرنے کے لیے قانونی تقاضے پورے نہیں کیے گئے ہیں ۔ جسٹس شاہد کریم نے بیرسٹر علی ظفر سے استفسار کیا کہ بتائیں کن قانونی تقاضوں کو پورا نہیں کیا گیا ہے ؟ بیرسٹرعلی ظفر کا نے جواب دیا کہ اسپیکر نے استعفے منظور کرنے سے قبل آئین کے تحت انکوائری نہیں کی تھی ۔ پاکستان تحریک انصاف کے وکیل کا کہنا تھا کہ ارکان اسمبلی استعفے منظور کروانے کے لیے اسپیکر کے پاس پیش نہیں ہوئے تھے ، ارکان کو سنے بغیر اسپیکر استعفے منظور نہیں کر سکتے ہیں ۔ خیال رہے کہ گذشتہ ماہ الیکشن کمیشن آف پاکستان نے پاکستان تحریکِ انصاف کے 43 ارکانِ قومی اسمبلی کو ڈی نوٹیفائی کر دیا تھا ۔