پنجاب میں الیکشن شیڈول کا اعلان خوش آئند، خدا کرے موخر نہ ہوں، شیخ رشید احمد

لاہور: سربراہ عوامی مسلم لیگ شیخ رشید احمد کا کہنا ہے کہ پنجاب میں الیکشن شیڈول کا اعلان خوش آئند ہے، خدا کرے موخر نہ ہوں ۔ تفصیلات کے مطابق سماجی رابطے کی ویب سائٹ ٹوئٹر پر اپنے پیغام میں سابق وفاقی وزیر داخلہ شیخ رشید احمد نے لکھا ہے کہ بظاہر حکومت الیکشن کرانے کے موڈ میں نہیں ہے ، یہ توہین عدالت کا بڑا رسک لینے جا رہی ہے ، اب آنے والے دنوں میں سیاست کے فیصلے عدالتوں میں ہوں گے، حکومت سیاسی اور معاشی استحکام نہیں صرف اپنے ذاتی مفاد کو دیکھ رہی ہے ۔ ان کا کہنا تھا کہ نگران حکومتیں منتخب حکومتوں سے دو ہاتھ آگے چلی گئیں ہیں ، ان کا کام الیکشن کروانا ہے ، من پسند راستہ بنانا نہیں ہے ، عمران خان اور تحریک انصاف کو روکنے کا ہر کام حکومت کے گلے الٹا ہی پڑتا ہے ، پیمرا کی پابندیاں قوم کو ٹیلی ویژن کی بجائے سوشل میڈیا پر لے جائیں گی۔ سابق وفاقی وزیر کا کہنا تھا کہ پی ٹی آئی کی پہلے دن الیکشن مہم میں ایک کارکن جاں بحق ہوگیا، جس دن انتخابی شیڈول آ رہا ہے، اسی دن دفعہ 144 لگائی جا رہی ہے، اسلام آباد میں لاٹھی چارج ہو رہا ہے، بلاول بھٹو زرداری امریکا میں عورت مارچ کی قیادت کر رہے ہیں۔ سربراہ عوامی مسلم لیگ نے مزید کہا کہ خیبر پختونخوا میں سپریم کورٹ کے فیصلے کو گورنر عزت نہیں دے رہا اور سپریم کورٹ کے فیصلوں کی سازش کے تحت تاخیر کر رہا ہے، 10 مہینے ہوگئے ہیں آئی ایم ایف سے ابھی تک مذاکرات جاری ہیں اور نتیجہ نہیں نکل رہا۔