سعودی عرب کا پاکستان میں سرمایہ کاری 10 ارب ڈالر تک بڑھانے پر غور

ریاض: سعودی عرب کی جانب سے پاکستان میں اعلان کردہ دس ارب ڈالر کی سرمایہ کاری مزید بڑھانے پر غور شروع کر دیا گیا ہے ۔ سعودی میڈیا کا کہنا ہے کہ سعودی ولی عہد شہزادہ محمد بن سلمان نے پاکستان میں سرمایہ کاری میں اضافے کا جائزہ لینے کی ہدایت جاری کر دی ہے ۔ خبر ایجنسی نے بتایا ہے کہ سعودی ولی عہد شہزادہ محمد بن سلمان نے سعودی ڈویلپمنٹ فنڈ کو پاکستان سینٹرل بینک میں جمع کروائی گئی 5 ارب ڈالر کی رقم بڑھانے پر جائزہ لینے کی ہدایت کر دی ہے ۔ سعودی خبر ایجنسی کے مطابق اسٹیٹ بینک میں ڈیپازٹ کی رقم دسمبر 2022 میں 5 ارب ڈالر کر دی گئی تھی ۔ وزیراعظم شہباز شریف اور سعودی ولی عہد کے درمیان حالیہ روابط کے تناظر میں یہ اعلان سامنے آیا ہے ۔ واضح رہے کہ سعودی عرب نے گذشتہ سال پاکستان میں دس ارب ڈالر کی سرمایہ کاری کا اعلان کیا تھا۔