(ویب ڈیسک) قومی ٹیم کے سابق کپتان اور سوئنگ کے سلطان وسیم اکرم قومی ٹیم کی بھارت کے ہاتھوں شکست پر برس پڑے۔
تفصیلات کے مطابق سابق کپتان وسیم اکرم نے کہا کہ اب وقت آگیا ہے کہ پاکستان کی نئی ٹیم بنائی جائے۔انہوں نے کہا کہ شرمندگی ہوتی ہے دس دس سال ہوگئے انہیں کھیلتے ہوئے، افتخار احمد کو میں بولنگ کروں تو وہ ایک ہی شاٹ لگائے گا۔ وسیم اکرم نے کہا کہ آف سائیڈ پر بھی کھیلنا سیکھ لو۔
ٹی 20 ورلڈ کپ میں گذشتہ روز بھارت نے پاکستان کو 6 رنز سے شکست دی، قومی ٹیم 120 رنز کا ہدف بھی حاصل نہ کرسکے جس پر سابق کرکٹرز اور شائقین کرکٹ کی جانب سے کڑی تنقید کی جارہی ہے۔
واضح رہے کہ ٹی 20 ورلڈ کپ کے سپر 8 مرحلے میں قومی ٹیم کی رسائی اگر مگر کی صورتحال سے دوچار ہوگئی ہے، بھارت سے قبل پاکستان کو امریکا نے بھی شکست دی تھی۔گرین شرٹس اپنے اگلے میچز کینیڈا اور آئرلینڈ کے خلاف کھیلے گی۔