ایشیا کپ کا فائنل کون جیتے گا؟ فیصلہ آج ہوگا
06:11 AM, 11 Sep, 2022
ایشیا کپ کرکٹ ٹورنامنٹ کا فائنل میچ آج بروز اتوار 11 ستمبر کو پاکستا ن اور سری لنکا کے درمیان کھیلا جائے گا۔ تفصیلات کے مطابق ایشیا کپ فائنل کی تمام تیاریاں مکمل ہوگئی ہیں۔ پاکستان اور سری لنکا ایک دوسرے کو ہرانے کے لئے آج میدان میں اتریں گے۔ دونوں ٹیموں کے درمیان فائنل پاکستانی وقت کے مطابق آج شام 7 بجے دبئِی اسٹیڈیم میں کھیلا جائے گا۔ سپر فور مرحلے میں سری لنکا سے شکست کے بعد پاکستانی ٹیم میں دو تبدیلیاں متوقع ہیں، عثمان قادر اور حسن علی سری لنکا کیخلاف کارکردگی نہیں دکھا سکے اس لئے ان دونوں کی جگہ نسیم شاہ اور شاداب خان کی واپسی ہوگی، جب کہ پاکستان ٹیم مینجمنٹ کیلئے فخر زمان اور مڈل آرڈر کا تسلسل کے ساتھ رنز نہ کرنا الگ سے پریشانی کا باعث بنا ہوا ہے۔ فائنل میچ میں سری لنکا کا انحصار مہیش تھیکشنا اور وینندو ہسرنگا کی سپن جوڑی پر ہوگا کہ جنہوں نے گذشتہ میچ میں پاکستان کی اننگز کو 121 رنز تک محدود رکھا۔ دوسری جانب پاکستانی تماشائیوں کی نظریں محمد نواز اور محمد رضوان پر ہیں، ٹورنامنٹ میں آوٹ آف فارم رہنے والے بابر اعظم کوفائنل میں کارکردگی دکھانا ہوگی۔ ماہرین کا کہنا ہے کہ ایشیا کپ کے فائنل میں ٹاس کی بھی بہت اہمیت ہوتی ہے اور یہ بھی کہا جارہا ہے کہ جو ٹیم ٹاس جیتے گی وہ دوسری ٹیم کو بیٹنگ کی دعوت دے گی۔ پاکستان نے اب تک ایشیا کپ میں 5 میں سے دو مرتبہ ٹاس جیتا ہے جب کہ سری لنکا نے 5 میں سے چار مرتبہ ٹاس جیتا ہے ۔ خیال رہے کہ پاکستانی ٹیم نے 2000 اور 2012 میں ایشیا کپ کا ٹائٹل جیتا تھا اپنے ، 2012 کے فائنل میں قومی ٹیم نے بنگلادیش کو شکست دے کر ٹائٹل اپنے نام کیا تھا ۔ پاکستان کے علاوہ ہندوستان سات بار جب کہ سری لنکا 5 مرتبہ ایشیا کپ جیت چکے ہیں۔