کپتان کی شادی کی خبرسے متعلق انکے والد کا بیان آگیا

قومی ٹیم کے کپتان بابر اعظم کی نومبر میں شادی کی خبریں سامنے آنے کے بعد سے ان کے والد اعظم صدیقی کا بیان بھی سامنے آگیا ہے۔ گذشتہ روز بابراعظم کے انتہائی قریبی ساتھی کی جانب سے تصدیق کی گئی تھی کہ قومی ٹیم کے کپتان کے گھر والے ان کی شادی رواں سال بھارت میں ہونے والے آئی سی سی ورلڈکپ کے بعد کرنے کا ارادہ رکھتے ہیں۔ خبر میں یہ بھی بتایا گیا تھا کہ بابر اعظم کی شادی ان کی کزن سے ہورہی ہے جو رشتے میں ان کی خالہ کی بیٹی ہیں۔ بعد ازاں بابر اعظم کے مینیجر نے سوشل میڈیا پوسٹ کے ذریعے بابر اعظم کی نومبر میں شادی کی خبر کو جعلی قرار دے دیا تھا۔ تاہم اب میڈیا رپورٹس میں پی سی بی کے نمائندے کا حوالہ دیتے ہوئے بتایا گیا ہے کہ بابراعظم کے والد اعظم صدیقی نے بھی نومبر میں بیٹے کی شادی کی خبروں کی تردیدکی ہے اور واضح کیا ہے کہ انہیں بیٹے کی شادی میں کوئی جلدی نہیں، بابر اعظم کی توجہ ابھی صرف کرکٹ پر ہے۔ میڈیا رپورٹس میں کہا گیا ہے کہ بابر اعظم کے والد کا مزید کہنا تھا کہ بابر کے مداحوں کو ان کی شادی کیلئے مزید ایک سال انتظار کرنا ہوگا۔