شیخ رشید کو 7 روز میں لال حویلی خالی کرنے کا حکم
02:07 PM, 16 Oct, 2022
متروکہ وقف املاک نے سابق وزیر داخلہ شیخ رشید کو سات روز کے اندر اندر لال حویلی خالی کرنے کا حکم دے دیا ہے۔ تفصیلات کے مطابق ڈپٹی ایڈمنسٹریٹر کی جانب سے شیخ رشید کو لال حویلی سمیت متروکہ وقف املاک کی 7 اراضی یونٹس سے بےدخلی کا نوٹس جاری کر دیا گیا ہے۔ نوٹس کے مطابق زیر قبضہ اراضی یونٹس 7 دن کے اندر خالی کرنا ہوگی ورنہ بذریعہ پولیس بے دخل کر دیا جائے گا۔ ڈپٹی ایڈمنسٹریٹر متروکہ وقف املاک بورڈ آصف خان نے ڈپٹی کمشنر راولپنڈی کو پولیس کی معاونت کیلئے بھی خط لکھ دیا ہے۔ خط میں 7 اراضی یونٹس خالی کرانےکے لیے 19 اکتوبر کو پولیس کی مدد مانگی گئی ہے۔