بھارتی ٹیم ایشیا کپ کیلئےپاکستان نہیں آئےگی،بی سی سی آئی

بھارتی کرکٹ بورڈ کے سیکرٹری اور ایشین کرکٹ کونسل کے صدر جے شاہ نے کہا ہے کہ 2023 کے ایشیا کپ میں بھارتی ٹیم پاکستان نہیں جائے گی۔ انڈین میڈیا کا کہنا ہے کہ بھارتی کرکٹ بورڈ کی سالانہ جنرل میٹنگ آج ممبی میں ہوئی ہے ، جس میں ایشین کرکٹ کونسل کے صدر جے شاہ نے پاکستان نہ جانے کا بیان دیا ہے۔ جے شاہ کا کہنا ہے کہ اگلے برس ایشیا کپ نیوٹرل وینیو پر ہو گا۔ ذرائع کے مطابق ایشین کرکٹ کونسل کے فورم کو بھارت نے نظر انداز کر دیا ہے۔ انڈیا سے تعلق رکھنے والے اے سی سی کے صدر نے خود ہی فیصلے سنانے شروع کر دیے ہیں۔ انہوں نے ایشین کرکٹ کونسل کے اجلاس کے بغیر ہی فیصلہ سُنا دیا۔ ذرائع کا کہنا ہے کہ اس فیصلے پر پاکستان کرکٹ بورڈ نے فی الحال اپنا مؤقف دینے سے انکار کردیا ہے ۔ پاکستان کرکٹ بورڈ اے سی سی کے فیصلے کا انتظار کرے گا ۔ واضح رہے کہ ون ڈے فارمیٹ کے ایشیا کپ کی میزبانی اگلے سال ستمبر میں پاکستان نے کرنی ہے۔