عمران خان کی وائرل ویڈیو پر تحریک انصاف کا ردعمل!

سوشل میڈیا پر سابق وزیر اعظم عمران خان کی ایک وائرل ویڈیو کو بطور حوالہ پیش کیا جا رہا ہے کہ عمران خان نے سابق صدر پرویز مشرف کی دہشت گردی کیخلاف جنگ میں حمایت کی تھی،تاہم اس ویڈیو پر ردعمل دیتے ہوئے تحریک انصاف کے رہنماء اظہر مشوانی کا کہنا تھا کہ ویڈیو دیکھ کر ایسا لگتا ہے کہ ناصرف آپ کی معلومات غلط ہیں بلکہ آپ مکمل طور پر ناسمجھ ہیں۔ ان کا کہنا تھا کہ یہ ویڈیو مشرف کی دہشت گردی کے خلاف جنگ کے بارے میں نہیں ہے بلکہ ہندوستان-پاکستان کے تعلقات میں تعطل کے نتیجے میں لشکر طیبہ اور جیش پر پابندی کے بارے میں ہے۔ اظہر مشوانی کے ٹوئٹ پر ردعمل دیتے ہوئے پاکستان تحریک انصاف کی مرکزی رہنما اور سابق وفاقی وزیر شیریں مزاری نے کہا کہ عمران خان کے بارے میں کتنے جھوٹ پھیلائیں گے؟ امریکا کی دہشتگردی کیخلاف جنگ پر عمران خان کا عوامی موقف ہر کوئی جانتا ہے! عمران خان نے اس جنگ کی مخالفت کی۔ ان کا مزید کہنا تھا کہ عمران خان نے ڈرون حملوں کی مخالفت کی اور پی ٹی آئی نے احتجاج کیا۔ عمران خان نے نیٹو کی سپلائی لائن کی بھی مخالفت کی۔