گلیڈی ایٹرز چاروں شانے چت، زلمی جیت گئے
07:55 PM, 26 Feb, 2021
کراچی (پبلک نیوز) پی سی ایل میلہ زور شور سے اپنے عروج کی جانب گامزن، پشاور زلمی کا شاندار کم بیک، کوئٹہ گلیڈی ایٹرز کے پہاڑ جیسے ہدف کو بھی حاصل کرتے ہوئے میچ اپنے نام کر لیا، 199 کا ہدف 7 وکٹوں پر حاصل کیا۔ پاکستان سپر لیگ کے آٹھویں میچ میں گلیڈی ایٹرز کی جانب سے سرفراز نے 81 رنز کے ساتھ شاندار اننگز کھیلی جبکہ اعظم خان نے بھی 47 رنز کے ساتھ نمایاں انداز میں اننگز کھیلی۔ مقررہ 20 اوورز میں کوئٹہ نے 198 رنز بنائے۔ پشاور کی جانب سے وہاب ریاض 2 اور ثاقب محمود نے 3 وکٹیں اڑائیں۔ پی ایس ایل 6 میں اس ہدف کو حاصل کرنے کے لیے زلمی میدان میں اترے اور 19.3 اوورز میں ہدف پورا کر لیا۔ پشاور کی جانب سے یہ ہدف 7 وکٹوں کے نقصان پر حاصل کیا گیا۔ حیدر علی مین آف دی میچ قرار پائے۔