(ویب ڈیسک) سعودی عرب کی حکومت نے مملکت میں کام کرنے والے ہنرمند غیر ملکی ورکرز کے لیے ایک بڑی اور شاندار سہولت کا اعلان کرتے ہوئے اب ورک پرمٹ کے ساتھ ہی ان کے اہلِ خانہ کے فیملی ویزے کا عمل بیک وقت مکمل کرنے کی باقاعدہ اجازت دے دی ہے۔
سعودی پریس ایجنسی (SPA) کی رپورٹ کے مطابق یہ نیا اقدام سعودی وزارتِ خارجہ اور وزارتِ انسانی وسائل و سماجی ترقی کے باہمی تعاون و اشتراک سے نافذ العمل کیا گیا ہے۔
اس فیصلے کا مقصد دنیا بھر سے آنے والے ہنرمند اور باصلاحیت ورکرز کو راغب کرنا اور مملکت میں ان کی رہائش کو مزید آسان اور پرسکون بنانا ہے۔
فیملی ویزے کے لیے اہل اہلِ خانہ کی تفصیلات:
نئی پالیسی کے تحت ہنرمند ورکر کے درج ذیل زیرِ کفالت اہلِ خانہ فیملی ویزے کے اہل ہوں گے۔
شریکِ حیات (بیوی/شوہر)
25سال سے کم عمر بیٹے
غیر شادی شدہ بیٹیاں
یہ تمام اہلِ خانہ اب گھر کے سربراہ کے ورک ویزے کے مراحل مکمل ہونے کے ساتھ ہی اپنا انٹری ویزا حاصل کرنے کے مجاز ہوں گے۔
سعودی عرب آمد کے بعد کا طریقہ کار:
رپورٹ کے مطابق، ورک ویزے کے ساتھ جاری ہونے والے انٹری ویزے پر اہلِ خانہ کے سعودی عرب پہنچنے کے بعد، مملکت کے مروجہ قوانین اور قانونی ضوابط کے تحت ان کے اقامے اور مستقل رہائش کے طریقہ کار کو حتمی شکل دی جائے گی۔